VOV4.Xơ Đăng - Kơxo lơ 24/2, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i hiăng pêi cheăng ƀă Khu kăn ki séa ngăn dêi Vi ƀan pơkuâ Kuô̆k hô̆i ‘na “Tơdroăng pêi pro mâu pơkâ dêi Vi ƀan pơkuâ Kuô̆k hô̆i ‘na xing xoăng mâu tíu pêi cheăng chêh pro hlá mơ-éa râ tơring, râ cheăm tung hneăng hơnăm 2019 – 2021”. Tơpui a rôh pêi cheăng, pôa Vương Đình Huệ, kăn xiâm hnê ngăn Kuô̆k hô̆i hiăng môi tuăn ƀă túa pơkâ tơbleăng mâu hnoăng cheăng ki nhên tung la ngiâ dêi Khu kăn séa ngăn, Kăn xiâm hnê ngăn Kuô̆k hô̆i pơchân pơtối hriăn ngăn nhên tối tơbleăng dêi mâu khu xiâm, kơvâ cheăng, kong pơlê, malối cho tối tơbleăng dêi Khu kăn Kuô̆k hô̆i ƀă Hô̆i đong hnê ngăn ƀă Măt trâ̆n Tơnêi têa mâu kong pơlê, pơlê kong kân ối tung Tơnêi têa.

A tíu hôp ing pơkuâ dêi pôa Vương Đình Huệ, Kăn xiâm hnê ngăn Kuô̆k hô̆i

Kăn xiâm hnê ngăn Kuô̆k hô̆i xuân pơkâ thế pêi pro nhên tâ hnoăng cheăng pơkuâ dêi khu râ Đảng, malối cho ngế ki pơkuâ xiâm mâu kong pơlê tung tơdroăng ki tối tơbleăng pêi pro troăng hơlâ xing xoăng tíu pêi cheăng chêh pro hlá mơ-éa râ tơring, râ cheăm, pơxúa ăm dêi tơná ing mâu tơdroăng ki rơkê plĕng vâ tơbleăng tơƀrê tâ tung hneăng hơnăm nếo.

Katarina Nga tơplôu ƀă tơbleăng