VOV4.Xơ Đăng - Klăng tro hâi pêi cheăng apoăng dêi hơnăm nếo Nhâm Dần, kơxo lơ 7/2, a Hngêi Kuô̆k hô̆i, pôa Vương Đình Huệ, Kăn xiâm hnê ngăn Kuô̆k hô̆i ƀă mâu kăn xiâm pơkuâ Kuô̆k hô̆i hiăng trâm mâ, pơcháu hnoăng cheăng ăm mâu kăn teăng mâ Kuô̆k hô̆i pơkuâ, kăn ƀô̆, kŏng chưk, viên chưk ƀă mơngế pêi cheăng dêi Ƀơrô Kuô̆k hô̆i.

Xông tơpui a roh trâm mâ, pôa Vương Đình Huệ, Kăn xiâm hnê ngăn Kuô̆k hô̆i tối nhên, tơdroăng pói vâ ai ivá ó rơdêi, tơkôm tung mâu troăng mơnhông tơtêk ton xŏn, tung mê ai tơdroăng mơnhông tơtêk ‘na mâu pơkâ, luât. Pôa Vương Đình Huệ tơbleăng tối ‘na roh lăm pôu rơkâu Têt Lo hơnăm nếo dêi Kăn xiâm hnê ngăn Kuô̆k hô̆i rơtế khu râ kăn pêi cheăng a 6 kong pơlê peăng Hdroh tơnêi têa ƀă mâu tơdroăng pêi cheăng dêi mâu Kăn xiâm phŏ hnê ngăn Kuô̆k hô̆i.

Pôa Vương Đình Huệ pơkâ thế, ‘na tơdroăng séa ngăn, klêi kơ’nâi Têt Lo hơnăm nếo, mâu Kăn pơkuâ séa ngăn thế pêi cheăng tâi ivá vâ pêi pro 4 tơdroăng séa ngăn dêi Kuô̆k hô̆i pơkâ mơ’no; tơdrêng amê séa ngăn 107 tơdroăng tơkêa bro tung Tơdroăng pêi cheăng dêi Đảng khu râ kăn Kuô̆k hô̆i pêi pro Pơkâ Hneăng hôp má XIII dêi Đảng ƀă 137 hnoăng cheăng mơjiâng luât tiô mơgêi 19 dêi Khu xiâm kal kí ‘na Tơdroăng tơkêa bro mơnhên troăng prôk la ngiâ Tơdroăng mơjiâng luât dêi Kuô̆k hô̆i hneăng má XV.

            A Sa Ly tơplôu ƀă tơbleăng