Kơxo hâi lơ 13/2, ăm hnê tối a tôh ‘na tơdroăng tơkêa luât Tơkŭm cheăng Chin phuh (‘mâi hơ’lêh), pôa Trần Thanh Mẫn, Kăn xiâm hnê ngăn Kuô̆k hô̆i  tối nhên, troăng hơlâ axoăng râ ki rơdêi ăm Chin phuh vâ Chin phuh pơkâ mâu tơdroăng ing tơdroăng ki hlo ai khât cho tơdroăng ki vâ tơleăng mơnhên mâu tơdroăng pá, tơvâ tơvân vâ pro troăng hlâu ăm mơnhông tơƀrê.

Pôa Trần Thanh Mẫn kăn xiâm hnê ngăn Kuô̆k hô̆i tối nhên, mâu tơdroăng hiăng ăm hlo nhên mơnúa mơnhên mê ăm pêi hlối. Malối, ôh tá xê xua mâu pơkâ, tơdroăng pro hlá mơ-éa kơtăng mê cho hrá mơnhông dêi tơnêi têa. Kăn xiâm hnê ngăn Kuô̆k hô̆i tối tiah kố, drêng ăm hnê tối ‘mâi hơ’lêh mâu luât ai tơdjâk troh thế pơtối séa ngăn, vâ rak tơniăn tơtro ƀă mâu pơkâ dêi Luât.

Ƀă Luât tơkŭm cheăng dêi mâu kăn kong pơlê (‘mâi hơ’lêh) kô xoăng râ hên tâ ăm mâu kăn tiô troăng pơkâ, kong pơlê pơkâ, kong pơlê pêi, kong pơlê chiu pôu râng hnoăng cheăng. Ing mê, tơdroăng pơkâ pêi dêi kong pơlê kô châ tơbrê tâ. Tơdroăng ‘mâi hơ’lêh luât tơkŭm Chin phuh kô pơcháu hnoăng cheăng pêi ăm Chin phuh xoăng hên ăm kong pơlê, Kuô̆k hô̆i kô mơdêk hnoăng cheăng séa ngăn.