VOV4.Xơ Đăng - Pơtối rôh lăm pêi dêi hnoăng cheăng a mâu kong pơlê peăng Hdroh ƀă Tơbăng kroăng Cửu Long, kơxo lơ 25/1, pôa Vương Đình Huệ, kăn xiâm hnê ngăn Kuô̆k hô̆i rơtế ƀă khu kăn ki pêi dêi hnoăng cheăng hiăng troh pôu, rơkâu Têt kăn ƀô̆, lêng kŏng an ƀă khu ngăn pơkeăng pơlât tung tơdroăng ki hbrâ mơdât pơreăng a kong pơlê Cà Mau. Pôa Vương Đình Huệ tối nhên, Cà Mau ai tíu cheăng ki tơviah ‘na cheăng kâ, gak kring pơlê pơla, kơpong tơnêi ki tĭng dêi tơnêi têa.

Xua cho kong pơlê tung la ngiâ, mê khu kŏng an kong pơlê Cà Mau kal mơ-eăm tâ nếo tâng vâ pơchông ƀă tiah hmâ. Vâ pâ mơnê mâu khu lêng cheăng hbrâ mơdât pơreăng COVID-19, teăng mâ ăm hnoăng cheăng ƀă teăng mâ kăn pơkuâ Đảng, Tơnêi têa, pôa Vương Đình Huệ, kăn xiâm hnê ngăn Kuô̆k hô̆i hiăng diâp tơmeăm ƀă rơkâu mâu kăn ƀô̆, lêng tung khu kŏng an kuăn pơlê ƀă mâu ƀok thái pơkeăng dêi kong pơlê Cà Mau rơtế ƀă rơpŏng hngêi vâi ai môi rôh Têt ki nếo, tro tiô tơdroăng pơkâ “Têt tơkŭm – Rơnó Hơngui tơniăn lĕm”.

Katarina Nga tơplôu ƀă tơbleăng