Drêng troh tơbâ 96 hơnăm hâi mơjiâng Đảng; Hneăng hôp mâu kăn tung lâp tơnêi têa rôh má 14 dêi Đảng hiăng klêi đeăng tơniăn lĕm; Tơbâ 80 hơnăm tơkŭm tâ phĭu rah xo kăn Kuô̆k hô̆i Việt Nam ƀă hbrâ tơdah Têt Bính Ngọ, kơxo hâi lơ 27/1,  pôa Trần Thanh Mẫn, Kăn xiâm hnê ngăn Kuô̆k hô̆i hiăng têk nhang tơbâ troh Ngế kăn xiâm hnê ngăn Kuô̆k hô̆i hneăng hdrối – pôa Bùi Bằng Đoàn, a Kơpong tíu xối tơbâ cheăm Ứng Thiên, Pơlê kong kân Hà Nội, ai pôa Trường Chinh, Kăn xiâm pơkuâ hnê ngăn Đảng hneăng hdrối, pôa Lê Quang Đạo, Kăn xiâm hnê ngăn Kuô̆k hô̆i hneăng hdrối, klêi mê, lăm pôu rơkâu Têt hơnăm nếo ăm pôa Nông Đức Mạnh, Kăn xiâm pơkuâ hnê ngăn Đảng hneăng hdrối, jâ Nguyễn Thị Kim Ngân, Kăn xiâm hnê ngăn Kuô̆k hô̆i hneăng hdrối.

Kăn xiâm hnê ngăn Kuô̆k hô̆i tối, mâu rơxông dêi mâu kăn Kuô̆k hô̆i nôkố púi vâ pêi pro tiu tuăn khên tơnôu dêi mâu pâ pôa ki prôk hdrối, ôh tá la lâi pơtê mơhriâm ăm tuăn kâi chân, khên tơnôu, tuăn ngôa lĕm tro, veăng ‘no hnoăng mơjiâng Kuô̆k hô̆i rế ton rế môi tuăn kuăn pơlê, rak tro luât, rơkê, pêi cheăng tiô túa ki nếo; tơxâng ƀă tuăn loi dêi Đảng, Tơnêi têa ƀă Kuăn pơlê.

Kăn xiâm hnê ngăn Kuô̆k hô̆i tối, tung la ngiâ Kuô̆k hô̆i kô pơtối hơ’lêh nếo tơrŭm cheăng, pêi cheăng, rơkê khât ƀă pêi cheăng tiô túa nếo nôkô vâ rế lĕm tro tâ nếo tung rơxông pêi cheăng tiô chal nếo dêi tơnêi têa. Pơtối mơ-eăm, hơ’lêh nếo túa pêi cheăng, hơ’lêh nếo  tuăn tơmiât troăng pêi, tiô troăng hơlâ pêi pro ƀă mơdêk tơbrê nếo; tơkŭm pê klêi, hlối mơnhông rĕng, tơƀrê tơnêi têa; mơ-eăm pêi tơbrê túa pêi cheăng “Kuô̆k hô̆i kơxô̆”.