Phiu ro tơdroăng ki thăm pơtroh mâu khu râ kăn pơla Kuô̆k hô̆i péa tơnêi têa, Kăn xiâm hnê ngăn Kuô̆k hô̆i pâ thế Khu kăn Kuô̆k hô̆i Việt Nam - Hàn Quốc chêh pro túa pơkâ pêi cheăng nhên vâ tơbleăng pêi pro, rak tơniăn tơƀrê ai pơxúa. Tơpui ‘na ivá xúa ki rơkê xua kuăn mơngế pro tung mơjiâng pro luât, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, Việt Nam hiăng ai Luât Tuăn ngôa rơkê xua kuăn mơngế pro ƀă Kuô̆k hô̆i dế mơdêk pơhlêh xúa internet, tơdrêng amê hlối ai tơdroăng ki xúa AI krê tung tơdroăng cheăng dêi Kuô̆k hô̆i, châ tơbleăng lối môi hơnăm hdrối ƀă pro pơxúa tơƀrê nhên. 

Tối nhên, Hàn Quốc nôkố cho ngế ki ‘no liăn cheăng kong têa ê kân má môi dêi Việt Nam, pôa Moon Jin Seok, Kăn xiâm hnê ngăn Khu kăn Kuô̆k hô̆i Việt Nam - Hàn Quốc tơngah pơkâ pêi ki xiâm mơdêk kơxô̆ liăn châ xo ing tê mơdró pơla péa pâ tâk troh 150 rơtal USD a hơnăm 2030 kô châ pro pơhlêh ki tơ’lêi hlâu; ăm ‘nâi Hàn Quốc xuân rơhêng vâ mâu khu mơdró kâ Hàn Quốc veăng tung mâu tơdroăng tơkêa bro hngêi trăng, troăng klông ki kân a Việt Nam, ing mê, pro chiâng mâu tơdroăng tơrŭm cheăng nếo, ai pơxúa ƀă ai troăng ngăn tơxâng tung hneăng mơnhông nếo dêi tơrŭm cheăng péa tơnêi têa.