A rôh tơdah, pôa Trần Thanh Mẫn, Kăn xiâm hnê ngăn Kuô̆k hô̆i pơkâ thế mơdêk rơdêi pơtroh mâu khu râ kăn, trâm mâ tơrá mâu khu râ kăn ƀă rêm râ; thăm mơnhông tơrŭm cheăng, trâm mâ, tối ăm dêi rơpó ‘nâi mâu tơdroăng ki rơkê plĕng pơla péa Kơ koan mơjiâng luât dêi péa tơnêi têa, malối cho pơla mâu Vi ƀan pơkuâ cheăng pêi dêi Kuô̆k hô̆i, mâu khu kăn Kuô̆k hô̆i tơrŭm tơroâ, mâu kăn Kuô̆k hô̆i vâi kơdrâi hơnăm ối nếo, ôh ti xê to tung mâu tơdroăng luât, troăng hơlâ pơkâ, mê ối tá mâu tơdroăng ki tơdjâk troh lâp plâi tơnêi môi tiah pơhlêh kơxô̆, mơdêk ngiât, hbrâ ví ƀă kong prâi pro pơhlêh.

Péa pâ môi tuăn pơtối thăm mơnhông tơrŭm, ‘mâi mơnhông tơrŭm ƀă hnoăng cheăng tíu xiâm dêi ASEAN, malối cho mâu tơdroăng tung kơpong ƀă a kong têa ê, malối cho ASEAN, Khu lâp kong têa, Tơdroăng ki Ôh tá tơrŭm; mâu rôh po hôp Kuô̆k hô̆i hên kơvâ môi tiah Hô̆i đong tơdjâk troh Kuô̆k hô̆i mâu kong têa ASEAN (AIPA), Khu tơrŭm Kuô̆k hô̆i Lâp plâi tơnêi (IPU), Rôh hôp Kuô̆k hô̆i Châu Á - Thái Bình Dương (APPF).