Luât tơbleăng mơ-éa pơkâ luât nôkố ai 173 troăng, Tơdroăng tơkêa bro Luât tơbleăng Kuô̆k hô̆i a Hneăng hôp kố bu u ối 72 troăng, kơdroh 101 troăng. Tiô troăng tơmiât pêi mơjiâng luât tiô troăng mâu tơdroăng ối tung hnoăng dêi Kuô̆k hô̆i mê Kuô̆k hô̆i pơkâ, mâu tơdroăng pêi ối tung hnoăng dêi Chin phuh, Chin phuh kô pơkâ, Kăn xiâm hnê ngăn Kuô̆k hô̆i tối nhên, tơdroăng rơnêu Luât Tơbleăng pơkâ mơ-éa luât cho xiâm kối ăm tơdroăng mơjiâng mâu luât nếo, xuân môi tiah ‘mâi rơnêu, tơ’nôm mâu luât tơniăn tro hnoăng.

Kăn xiâm hnê ngăn Kuô̆k hô̆i tơbleăng 5 tơdroăng xiâm tung ‘mâi rơnêu luât, tung mê tơmiât troh thăm mơdêk hnoăng kơ koan tơbleăng tung tơdroăng pôu râng troh tui lui, ki rơhêng vâ tối cho hnoăng dêi mâu Ngế xiâm, Kăn pơkuâ kơvâ cheăng.

Pôa Trần Thanh Mẫn tối, tâng Luât châ tơbleăng ăm pêi pro a hneăng hôp kố, kô pro tơ’lêi hlâu ăm tơdroăng mơjiâng, pêi kêi đeăng luât tung hơnăm 2025 ƀă pro tơ’lêi hlâu ăm hneăng cheăng Kuô̆k hô̆i hneăng má 16, hơnăm 2026 – 2031.