VOV4.Xơ Đăng - Drêng tơbâ hâi vâi kơdrâi lâp plâi tơnêi lơ 8/3 ƀă koh tơdah Hneăng hôp Khu kăn cho vâi kơdrâi lâp tơnêi têa rôh má 13, hneăng hơnăm 2022 -2027, kơxo lơ 8/3, a Hngêi Kuô̆k hô̆i, pôa Vương Đình Huệ, kăn xiâm hnê ngăn Kuô̆k hô̆i hiăng trâm mâ Khu kơtu ƀâ long cho vâi kơdrâi Việt Nam – mâu “Vâi kơdrâi Hơlŏng Trĭng” – mâu “Vâi kơdrâi Mêa” dêi tơdroăng kơtú ƀa long Việt Nam.

Kăn xiâm hnê ngăn Kuô̆k hô̆i trâm mâ Khu kơtú ƀâ long vâi kơdrâi Việt Nam drêng Hâi vâi kơdrâi lâp plâi tơnêi lơ 8/3

Tơpui a rôh trâm mâ, pôa Vương Đình Huệ, kăn xiâm hnê ngăn Kuô̆k hô̆i tối nhên, athế pơkâ tơdroăng ki tơ’noăng ivá tơdâng ƀă mâu tơdroăng ki rơhêng vâ ki ê, môi tiah toán, ngê̆ thuât, văn hok, ngôn ngữ ƀă hên ki ê vâ rĕng châ hlo ki rơkê tung châ, ai troăng hnê tơtro, pôi tá lôi kơbố ki lâi, pro mơdâi tơdroăng ki rơkê tung châ tung kơvâ pơtâp ivá.

Mơhno tối mâu tơdroăng ki rơhêng vâ, tơdroăng pơkâ ki kơvâ ngăn pơtâp ivá hiăng mơ’no ƀă troăng prôk troh, tung mê ai kơtú ƀa long tối tơdjuôm ƀă khu kơtú ƀa  long vâi kơdrâi tối krê, pôa Vương Đình Huệ pơkâ thế, kal ‘nâi nhên, mơdêk ki hlê plĕng mâu túa pơkâ dêi Đảng, tơnêi têa ‘na mơdêk hnoăng cheăng dêi vâi kơdrâi tung tơdroăng cheăng mơjiâng ƀă rak vế Tơnêi têa, ‘na mơnhông pơtâp ivá tơnêi têa tối tơdjuôm ƀă mơnhông khu kơtú ƀa long vâi kơdrâi tối krê.

Katarina Nga tơplôu ƀă tơbleăng