Leh tơbâ xua Khu pơtâng tối ƀă Mơhnhôk Tơnêi têa, Khu xiâm pơkuâ ngăn pơkeăng ƀă khăm pơlât tơkŭm po. Teăng mâ khu râ kăn pơkuâ Đảng, Tơnêi têa, pôa Trần Thanh Mẫn, Kăn xiâm hnê ngăn Kuô̆k hô̆i mơnhên ƀă kheăn kơdeăn, mơnhên tơdroăng mơ-eăm, pleăng dêi châ chăn, pleăng hnoăng cheăng dêi khu ƀok thái pơkeăng ƀă kơvâ khăm pơlât hiăng châ tơƀrê tung pơla kố nah.

Pôa Trần Thanh Mẫn, Kăn xiâm hnê ngăn Kuô̆k hô̆i mơnhên, Đảng, Tơnêi têa pin đi đo mơnhên, gâk kring, rak ngăn ƀă mơdêk ivá ăm kuăn pơlê cho môi tung mâu hnoăng cheăng ki kal, kơjo má môi; hiăng ƀă dế pêi pro tŭm, teăm tơdrêng, mơdêk kơvâ khăm pơlât mơnhông ó rơdêi tung hneăng nếo.

Kăn xiâm hnê ngăn Kuô̆k hô̆i loi tơngah, khu ƀok thái pơkeăng, kăn ƀô̆, nhân viên kơvâ khăm pơlât pơtối tơrŭm môi tuăn, pêi cheăng tơmiât pêi rơkê, châ tơƀrê hên tâ mê nếo; đi đo tơxâng ‘’Ƀok thái pơkeăng môi tiah nôu têm rơpiât’’, chiâng ‘’Tơdroăng rơhdruê ngế khên tơnôu ếo rơbông’’ ki kuăn pơlê đi đo pói tơngah, tơkôm.