Kơxê lơ 23/7, tung roh lăm pôu pêi cheăng Senegal, pôa Trần Thanh Mẫn, Kăn xiâm hnê ngăn Kuô̆k hô̆i ƀă Kăn xiâm hnê ngăn Kuô̆k hô̆i kong têa Senegal – pôa El Malick Ndiaye hiăng rơtế veăng Tơpui tơno troăng hơlâ vâ mơdêk tơrŭm cheăng pơla péa pâ. Pôa Trần Thanh Mẫn, Kăn xiâm hnê ngăn Kuô̆k hô̆i tối ăm ‘nâi, Việt Nam ai hên rơxông ki rơdêi kô tơrŭm ƀă Senegal, môi tiah: pêi chiâk deăng, hyôh măng, kŏng ngê̆ kơxô̆, chiâ xo tơmeăm khoăng tung kơdâm tơnêi, păn ká xi xŏng, mơjiâng ƀă mơjiâng hngêi trăng troăng klông.

Pôa Trần Thanh Mẫn, Kăn xiâm hnê ngăn Kuô̆k hô̆i tối loi tơngah mâu khu xiâm, kơvâ cheăng, khu tê mơdró péa tơnêi têa Việt Nam ƀă Senegal kô mơ-eăm mơdêk tơrŭm cheăng rế hía rế trâu rơdâ, châ tơƀrê. Pôa pơkâ thế péa pâ kô thăm tơrŭm vâ tŏng gum khu tê mơdró Việt Nam mơ’no liăn cheăng a Senegal, tơdrêng amê pói vâ Kuô̆k hô̆i Senegal pro tơ’lêi hlâu ăm tơdroăng mơ’no liăn cheăng. Kuô̆k hô̆i Việt Nam xuân hbrâ tŏng gum khu tê mơdró Senegal mơ’no liăn cheăng a Việt Nam tung mâu kơvâ tơmeăm khoăng.