VOV4.Xơ Đăng - Kơxo lơ 10/3, Vi ƀan pơkuâ tơdroăng cheăng Kuô̆k hô̆i tơpui ‘na tơdroăng tơkêa bro Luât hdrối kơ’nâi, pro mơ-éa, séa ngăn, pơkâ djâ mơngế ôh tá păng lôi pâk chik ma tŭi sap ing 12 hơnăm troh pái kơdâm 18 hơnăm mot a tíu mơgât pâk chiâk ma tŭi ki pơklât. Xông tơpui pơxiâm po roh hôp, pôa Vương Đình Huệ, Kăn xiâm hnê ngăn Kuô̆k hô̆i tối ăm ‘nâi: Vi ƀan pơkuâ tơdroăng cheăng Kuô̆k hô̆i hiăng pêi pro troăng cheăng ƀă pâ tơpui 6 khu tơdroăng.

Pôa Vương Đình Huệ, Kăn xiâm hnê ngăn Kuô̆k hô̆i xông tơpui a hneăng hôp

Ngăn tiô phĭu têk kŏng môi tuăn hiăng pơkâ 2 khu tơdroăng ‘na kơ-êng pôa Nguyễn Hồng Diên, Ngế xiâm pơkuâ kơmăi kơmok – tê mơdró ƀă pôa Trần Hồng Hà, Ngế xiâm pơkuâ loăng pơlái kong kế ƀă kong prâi. A roh hôp kơxo, Vi ƀan pơkuâ tơdroăng cheăng Kuô̆k hô̆i môi tuăn ƀă tơdroăng ki kal ‘na luât ‘na tơdroăng pêi pro hdrối kơ’nâi, pro mơ-éa, pơkâ djâ mơngế ki ôh tá păng lôi pâk chik ma tŭi tŭm 12 hơnăm troh pá kơdâm 18 hơnăm mot tung tíu pro ăm pơtê lôi pâk chik matŭi ki pơklât.

Laga, tiô mâu kăn teăng mâ, ngế ki pơ’lêh dêi kơxop mơ-éa luât cho mơngế ôh tá păng lôi pâk chik ma tŭi sap ing tŭm 12 hơnăm troh pá kơdâm 18 hơnăm ƀă tơdroăng djâ vâi a tíu pro ăm lôi pâk chik ma tŭi ki pơklât ôh tá xê cho troăng pơxâu phâk liăn, xua mê kal mơhno tơdroăng ki phá tơ-ê kố, pro mơ-éa tơ’lêi tơniăn lĕm, rơkê ƀă tơniăn pơxúa lĕm má môi dêi mơngế ki tro pơkâ thế.

A Sa Ly tơplôu ƀă tơbleăng