VOV4.Xơ Đăng -  Kơxo lơ 6/4, a Tiền Giang, pôa Nguyễn Xuân Phúc, Kăn xiâm hnê ngăn tơnêi têa lăm pôu ngăn túa pơkâ mơjiâng pro tê mơdró dêi Khu pêi cheăng tơrŭm plâi rơga Mỹ Tịnh An, tơring Chợ Gạo, môi túa pơkâ pêi cheăng tơƀrê kơnôm ing tơrŭm pơla kuăn pơlê ki pêi chiâk deăng krá tơniăn, malối cho đi đo roê xo plâi rơga ăm mâu ngế tung khu tơrŭm ƀă yă kơnâ tâ kơchơ mơdró roê, rak tơniăn laih iâ má môi 3 rơpâu liăn tung môi kg drêng khu kơchơ mơdró kơdroh yă.

Kăn hnê ngăn tơnêi têa mơnhên tối khât Khu pêi cheăng Mỹ Tịnh An ai túa pơkâ pêt tê mơdró tơƀrê, tơkŭm tơrŭm pêt tro, mơnhông kơpong pêt plâi rơga xiâm dêi kong pơlê môi tiah plâi rơgá, plâi tuâk. Mâu plâi ki pêt ƀă kơmăi kơmok rơxông nếo, rak vế tơniăn tơdroăng ki pơkâ tro, pêi pro tro tơdroăng ki tê ngi hên kong têa ki xơpá rian tiô troăng ki xiâm cho kơxô̆ liăn pêi lo. Kăn xiâm hnê ngăn tơnêi têa xuân pơkâ thế Khu pêi cheăng tơrŭm Mỹ Tịnh An pơtối mơdêk rơdêi tơdroăng tơrŭm, po rơdâ túa pêt tê hên mâu kế tơmeăm ki xiâm ki ê dêi kong pơlê, pakĭng plâi rơgá; ai tơdroăng ki tê tá plâi tung tơnêi têa.

Katarina Nga tơplôu ƀă tơbleăng