Pôa Lương Cường, Kăn xiâm hnê ngăn tơnêi têa ƀă kơdrâi pôa rơtế khu râ kăn teăng mâ râ kăn xiâm Việt Nam mơgêi lĕm tro roh lăm pôu pêi cheăng veăng mâu tơdroăng râ kăn xiâm Hneăng hôp kân Khu lâp kong têa hneăng 80, tơdjêp tơdroăng pêi cheăng pơla péa pâ a Mih, sap hâi lơ 21 troh 24/9.

Tung roh lăm pôu pêi cheăng, Kăn xiâm hnê ngăn tơnêi têa hiăng ai mâu ƀai xông tơpui ki kal a Roh hôp tơpui tơno tơdjuôm khu râ kăn xiâm dêi Hneăng hôp kân Khu lâp kong têa hneăng má 80 ƀă Tơdroăng ki kal khu râ kăn xiâm lâp plâi tơnêi ki má môi ‘na Tơdroăng pêi pro ‘na kong prâi.

Tơdrêng amê, Kăn xiâm hnê ngăn tơnêi têa hiăng ai mâu roh trâm mâ, tơpui tơno pơla péa pâ ƀă khu râ kăn pơkuâ mâu khu tŭm lâp plâi tơnêi ƀă khu râ kăn pơkuâ mâu kong têa. Kăn xiâm hnê ngăn tơnêi têa mơnhên Việt Nam đi đo mơ-eăm tâi ivá tơná ƀă rơtế pêi cheăng rơtế tâi tâng mâu kong têa vâ pôu râng mâu hnoăng cheăng tơdjuôm, tơkâ hluâ pơloăng mơnúa, mơdêk pơhlêh ó rơdêi vâ mơjiâng môi plâi tơnêi hơniêp lĕm, tơniăn, mơnhông kro mơdrŏng ƀă krá tơniăn, djâ hơniêp lĕm, hơtô ăm rêm ngế kuăn pơlê. Roh lăm pôu pêi cheăng dêi Kăn xiâm hnê ngăn tơnêi têa châ tơƀrê lĕm hluâ tá hên pâ ƀă pơla péa pâ, lôi ăm tơdroăng ki lĕm ‘na hnoăng cheăng, tíu pêi cheăng, veăng tơlo hên, păng ‘nâng dêi Việt Nam tung tơleăng mâu tơdroăng lâp plâi tơnêi xuân môi tiah mơdêk tơrŭm cheăng Việt Nam ƀă Mih, tơrŭm cheăng Việt Nam ƀă mâu kong têa vâ veăng kum ăm hơniêp, mơnhông a kơpong ƀă lâp plâi tơnêi.