VOV4. Xơ Đăng - Pơtối tơdroăng pêi cheăng a kong pơlê An Giang, kơxo lơ 18/1, a pơlê kong kơdrâm Long Xuyên, pôa Nguyễn Xuân Phúc, Kăn xiâm hnê ngăn tơnêi têa veăng leh pơxiâm pro tơdroăng tơkêa bro mơ’no liăn mơjiâng pro troăng kân lăm ngi kong têa ê kơxô̆ 91 ƀă troăng ki ví pơlê kong kơdrâm Long Xuyên. Kố cho tơmeăm hngêi trăng, troăng klông apoăng dêi Khu xiâm pơkuâ troăng prôk ƀă rơxế kơtâu châ mơjiâng pro tung hơnăm 2022.

Tơdroăng tơkêa bro mơ’no liăn mơjiâng troăng kân tơdjêp troăng kân lăm ngi kong pơlê ki ê kơxô̆ 91 ƀă troăng kân ví pơlê kong kân Long Xuyên châ pôa Nguyễn Xuân Phúc, Ngế pro xiâm hnê ngăn tơnêi têa hneăng hdrối, nôkố cho Kăn xiâm hnê ngăn tơnêi têa kĭ ăm pêi pro troăng hơlâ mơ’no liăn cheăng sap hơnăm 2017, ối tung tơdroăng cheăng tơdjuôm dêi Tơdroăng tơkêa bro tơdjêp tơbăng Mekong.

Tơdroăng tơkêa bro ai tâi tâng kơxô̆ liăn 2.100 rơtal liăn, châ mơ’no liăn cheăng ƀă kơxô̆ liăn dêi Hngêi arak liăn mơnhông mơdêk châu Á dó inâi ADB ƀă môi iâ kơxô̆ liăn xo hdrối dêi Chin phuh Việt Nam, xua Khu xiâm pơkuâ troăng prôk ƀă rơxế kơtâu pơkuâ mơ’no liăn. Kố cho tơmeăm ki tơxâng tiô tơdroăng pói tơngah plâ 20 hơnăm hiăng hluâ dêi kuăn pơlê An Giang.

Pôa Nguyễn Xuân Phúc phiu ro veăng leh pơxiâm pro ƀă pói vâ, kố cho tơdroăng tơkêa bro pơxiâm apoăng hơnăm 2022 vâ ing mê pơtối po rơdâ mâu tơdroăng mơ’no liăn hên tâ mê nếo tá troăng troăng prôk, troăng têa kơxĭ, troăng têa kroăng a An Giang ƀă kơpong tơbăng kroăng Cửu Long, kơpong 20 rơtuh ngế kuăn pơlê ƀă ai hên tơmeăm vâ mơnhông mơdêk.

Pơtối mê tung kơxê lơ 18/1, pôa Nguyễn Xuân Phúc, kăn xiâm hnê ngăn tơnêi têa veăng a leh hiăng pro klêi Hngêi kơmăi phái Hạnh Phúc ối a tơring Tri Tôn, kong pơlê An Giang. Kố cho hngêi kơmăi ki châ mơnhên tối ai túa pơkâ kân má môi châu Á ƀă tâi tâng ki têi ki uâ báu châ 1 rơpâu tâ̆n tung môi hâi. Pôa Nguyễn Xuân Phúc tối nhên, ƀă môi tơdroăng ki pêi chiâk deăng môi tiah tơnêi têa pin, tơdroăng ki mơhnhôk pêi chiâk deăng uâ pơliê cho tơdroăng ki kal khât vâ pro ki kơnía mơdêk, kum ăm tơdroăn g rêh ối dêi kuăn pơlê.

Rơkâu thế kŏng ti Tơlo liăn Grup pơkuâ Tân Long hiăng pro klêi hngêi kơmăi uâ báu Hạnh Phúc, Kăn xiâm hnê ngăn tơnêi têa pơkâ thế Kŏng ti ôh ti xê tơmâng to troh tơdroăng ki tơxup tơbriât tung kơchơ mơdró tê ngi kong têa ê mê ối kal tơbleăng ing hlá mơ-éa chêh ‘măn dêi tơná, tơrŭm tro ƀă kuăn pơlê, pôi tá chiâng hjip yă báu dêi kuăn pơlê.

A Sa Ly - Katarina Nga  ƀă tơbleăng