VOV4.Xơ Đăng - Kơxo lơ 17/1, a pơlê kong kân Đà Nẵng, Khu hnê mơhno mơjiâng Tơdroăng tơkêa bro ‘’Troăng pêi ton xŏn mơjiâng ƀă pêi kêi đeăng tơnêi têa tiô luât xah hô̆i chuh ngiah Việt Nam troh hơnăm 2030. tơmiât pêi troh hơnăm 2045’’ tơkŭm po Hneăng hôp tơpui tơno tơnêi têa dó inâi: ‘’Pơtối thăm pro rơdêi, mơdêk châ tơƀrê pơ’lêh luât tơxâng tiô pơkâ mơjiâng ƀă kêi đeăng tơnêi têa tiô luât xah hô̆i chuh nghiah Việt Nam troh hơnăm 2030, mơnhên troăng prôk la ngiâ troh hơnăm 2045’’.

Pôa Nguyễn Xuân Phúc, Kăn xiâm hnê ngăn tơnêi têa, Kăn pơkuâ hnê mơhno mơjiâng tơdroăng tơkêa bro pơkuâ hneăng hôp tơpui tơno. Xông tơpui a roh hôp tơpui tơno, pôa Nguyễn Xuân Phúc kheăn kơdeăn hôm păng ‘nâng mâu kăn teăng mâ tơpui tối hên tơdroăng ki vâ păng ‘nâng, pro mơnhên mâu tơdroăng kal tơleăng dêi troăng pêi ton xŏn pơ’lêh luât nếo, môi tung mâu tơdroăng ki xiâm dêi Tơdroăng tơkêa bro ton xŏn kố.

Môi tuăn ƀă mâu kăn teăng mâ xông tơpui, Kăn xiâm hnê ngăn tơnêi têa tối, tung pơla lâp plâi tơnêi pơ’lêh nếo, mot tơrŭm lâp plâi tơnêi, pêi cheăng kâ xúa kơmăi kơmok, pơlê pơla xúa kơmăi kơmok ƀă tơdjâk trâu hơngế dêi tơdroăng pơ’lêh pêi cheăng xúa kơmăi kơmok roh má pŭn troh rêm tơdroăng rêh ối pơlê pơla, pơkâ thâ pơkâ cho pơtối pơ’lêh ó rơdêi ‘na luât Việt Nam.

A Sa Ly tơplôu ƀă tơbleăng