VOV4.Xơ Đăng - Kơxo lơ 17/3, a Pơlê kong kân Hồ Chí Minh, pôa Nguyễn Xuân Phúc, Kăn xiâm hnê ngăn tơnêi têa hiăng pơkuâ hneăng hôp tơpui tơno râ tơnêi têa roh má 3 ‘na mơjiâng tơnêi têa tiô luât. Hneăng hôp tơpui tơno dó inâi: ‘’Mâu tơdroăng nếo, tơtêk tung mơjiâng ƀă rak tơniăn tŭm Tơnêi têa tiô luât xah hô̆i chuh ngiah Việt Nam troh hơnăm 2030, tơmiât troh troh hơnăm 2045’’.

Klêi môi hâi tơmâng, tơpui tơno, tơmâng xo mâu tơdroăng chêh tối, rơkong tơpui a Hneăng hôp tơpui tơno, pôa Nguyễn Xuân Phúc, Kăn xiâm hnê ngăn tơnêi têa mơnhên, châ tơƀrê pái roh tơpui tơno lâp tơnêi têa ‘na kơvâ kố ai kơnâ má môi păng ‘nâng, pơkâ ăm tơdroăng châ tơƀrê drêng pêi pro tơdroăng nôkố ƀă tơdroăng cho hên, cho kơnâ ‘nâng vâ rah xo, djâ tung tơdroăng xiâm dêi Tơdroăng tơkêa bro ƀă Tơdroăng chêh pro hdrối Pơkâ tơbleăng Tơnêi têa.

Pôa Nguyễn Xuân Phúc, Kăn xiâm hnê ngăn tơnêi têa

Kăn xiâm hnê ngăn tơnêi têa tối nhên, Tơdroăng tơkêa bro ‘’Troăng pêi ton xŏn mơjiâng ƀă rak tơniăn Tơnêi têa tiô luât xah hô̆i chuh ngiah Việt Nam troh hơnăm 2030, tơmiât pêi troh hơnăm 2045’’ cho kal khât má môi. Kố cho roh tơ’lêi hlâu, mơjiâng tơdroăng mơnhông tung tơdroăng pơ’lêh nếo khu cheăng kal kí, tơxâng tiô tơdroăng pơkâ mơnhông mơdêk cheăng kâ kơchơ tê mơdró tiô troăng xah hô̆i chuh ngiah ƀă mot tơrŭm tung lâp plâi tơnêi.

A Sa Ly tơplôu ƀă tơbleăng