VOV4.Xơ Đăng - Hâi lơ 6/2, a tíu tơbâ ton nah ‘na mơhno túa lĕm tro râ tơnêi têa ki tơviah dêi tíu xối tơbâ Pơtáu Hùng, pơlê kong kơdrâm Việt Trì, kong pơlê Phú Thọ pôa Nguyễn Xuân Phúc, kăn xiâm hnê ngăn tơnêi têa mơhnhôk pêt loăng đi đo pâ Pôa Hồ. Tơdroăng mê, xua Khu xiâm ngăn ‘na chiâk deăng ƀă mơnhông thôn pơlê ƀă Vi ƀan kong pơlê Phú Thọ tơrŭm ƀă tơkŭm po.  Xông tơpui a hâi leh, pôa Nguyễn Xuân Phúc krếo thế rêm ngế, rêm hngêi, rêm kơ koan, tôh tơrŭm cheăng veăng ‘no hnoăng pêi ai pơxúa tơdroăng pêt môi rơtal xiâm loăng ngiât pơla hơnăm 2021-2025 - Xua môi Việt Nam ngiât lĕm, veăng mơnhông mơdêk tơnêi têa pin đi đo ngiât lê̆m ƀă krá tơniăn. 

Kăn xiâm hnê ngăn tơnêi têa pơkâ thế kong pơlê Phú Thọ pêt ki iâ gá 2 rơtuh xiâm loăng ngiât tung hơnăm kố môi tiah tơdroăng hiăng pơcháu. Tung mê, hơnăm 2020, Ngế pro xiâm hnê ngăn Chin phuh hiăng ai pơkâ kơxô̆ 45 pâ thế tơkŭm Têt pêt loăng ƀă mơdêk hnoăng rak ngăn loăng ăm xông dâi lĕm vâ pêi tơdroăng pêt 1 rơtal xiâm loăng “Xua môi Việt Nam ngiât lĕm’’. Hơnăm 2021, Ngế pro xiâm hnê ngăn Chin phuh kĭ tơdroăng Tơkêa bro kơxô̆ 524 ƀă tơdroăng pơkâ troh hơnăm 2025, lâp tơnêi têa pêt châ môi rơtal xiâm loăng ngiât.

Gương tơplôu ƀă tơbleăng