VOV4.Xơ Đăng - Kơxê lơ 15/2, drêng tơbâ 233 hơnăm ƀlêi trâng Ngọc Hồi - Đống Đa (1789-2022), 92 hơnăm hâi mơjiâng Đảng Cộng sản Việt Nam, kong pơlê Bình Định tơkŭm po Leh hiăng pro klêi Tíu xối tơbâ Tay Sơn Tam Kiệt, tíu xôi tơbâ kố ai pơxúa kal khât ‘na tơdroăng ton nah, mơhno túa lĕm tro, khoa hok, tơtro ƀă inâi dêi Pơtáu Quang Trung ƀă tơdroăng pơxiâm tơplâ Tây Sơn, chal pơtáu Tây Sơn mơ’nui chal 18.

Kăn xiâm hnê ngăn tơnêi têa veăng a Leh hiăng pro klêi Tíu xôi tơbâ Tây Sơn Tam Kiệt a Bình Định

Veăng a leh kố ai pôa Nguyễn Xuân Phúc, Kăn xiâm hnê ngăn tơnêi têa prếi kơdrâi pôa, kăn pơkuâ mâu khu xiâm, kơvâ cheăng tơnêi têa, kong pơlê ƀă hên hĭn kuăn pơlê kong pơlê Bình Định. Tơpui a rôh leh, kăn xiâm hnê ngăn tơnêi têa tối 5 ƀai hriâm sap ing Quang Trung – Nguyễn Huệ, pơtáu sap ing ton nah rơkê ‘na tuăn ngoâ, rơkê ‘na tơchok. Kố cho mâu ƀai hriâm ki kal ƀă hnoăng cheăng gak kring pơlê cheăm, gak kring tơnêi têa ƀă ai hên mâu tơdroăng ki pơxúa trâu hngế ‘na mơnhông mơdêk cheăng kâ rêh ối pơlê pơla ăm Bình Định tối krê ƀă lâp tơnêi têa tối tơdjuôm.

Drêng kố, kăn xiâm hnê ngăn tơnêi têa pơkâ thế Đảng ƀô̆ khu kăn pơkuâ ƀă kuăn pơlê kong pơlê Bình Định rơtế ƀă Khu xiâm ngăn mơhno túa lĕm tro, Tơ’noăng ivá ƀă Ôm hyô, mâu kơ koan, khu tơrŭm ki ai tơdjâk kal tơbleăng kơtăng ƀă tơƀrê tơdroăng tơnêi têa rak vế ƀă mơdêk krá tơniăn ton ki kơnía dêi tíu xối tơbâ Tơnêi têa ki tơviah kố.

Katarina Nga tơplôu ƀă tơbleăng