VOV4.Xơ Đăng - Kơxo lơ 7/2, a Hà Nam, pôa Nguyễn Xuân Phúc, Kăn xiâm hnê ngăn tơnêi têa veăng leh pơxiâm pro tơdroăng tơkêa bro ki má II, hneăng má 2, ối tung tơdroăng tơkêa bro mơ’no liăn mơjiâng pro troăng kân tơdjêp troăng kân ăm phêp rơxế kơtâu têi Hà Nội – Hải Phòng ƀă troăng kân ăm phêp rơxế kơtâu têi Cầu Giẽ - Ninh Bình. Tơdroăng tơkêa bro ki má II, hneăng má 2 ai tâi tâng kơxô̆ liăn mơ’no 702,82 rơtal liăn, xŏn 16,3 km, xua Khu pơkuâ troăng prôk ƀă rơxế kơtâu kong pơlê Hà Nam pro khu ki mơ’no liăn, khu ki tơdah pro mê cho khu tê mơdró mơjiâng pro tơmeăm khoăng Xuân Trường, hâi khế pêi kêi đeăng troăng kân hơnăm 2023.

Kăn xiâm hnê ngăn tơnêi têa rơtế mâu kăn teăng mâ tiê kơlo pơxiâm vâ mơjiâng pro

Xông tơpui a leh pơxiâm pro, pôa Nguyễn Xuân Phúc, Kăn xiâm hnê ngăn tơnêi tối rơdêi ki kal dêi troăng kân ăm phêp rơxế kơtâu têi tơdjêp kố, ôh tá xê to kum kơdroh chôm drô troăng kân ăm kơpong tung pơlê kong xiâm mê ối mơdêk ki châ tơƀrê tơdjêp troăng klông, mơhnhôk mơ’no liăn cheăng ƀă po rơdâ tiú mơnhông mơdêk tê mơdró, ôm hyô, tíu kơdrâm kuăn pơlê rêh ối dêi kơpong tơbăng peăng Kơnhŏng tơnêi têa.

Kăn xiâm hnê ngăn tơnêi têa pơkâ thế Khu xiâm pơkuâ troăng klông, kong pơlê Hà Nam, khu ki pơkuâ mơ’no liăn, mâu khu ki tơdah mơjiâng pro kal hlê plĕng tŭm tâi pôu râng hnoăng tung tơdroăng mơjiâng pro, pêi tro tiô tơdroăng pơkâ, tơniăn dâi lĕm ƀă châ tơƀrê tung tơdroăng mơjiâng pro troăng kân, hbrâ mơdât mâu tơdroăng ki ôh tá tro, kâ kơhveăm liăn ngân tung mơ’no liăn cheăng, mơjiâng kế tơmeăm khoăng.

A Sa Ly tơplôu ƀă tơbleăng