Tối tơbleăng a rôh tơkŭm ôu kâ, Kăn xiâm pơkuâ kong têa Italia tối: Việt Nam cho môi kong têa ki tơrŭm kal ƀă tơdâng hlối rơkê dêi Ấn Độ Dương - Thái Bình Dương, kơpong ki Italia dế rế tơmâng khât, malối tung troăng rơhlâ cheăng dêi Khu tơrŭm châu Âu.

Tơbleăng tiâ, pôa Võ Văn Thưởng tối mâu tơdroăng kal tơpui tơn ƀă Kăn xiâm pơkuâ kong têa ƀă mâu Kăn xiâm dêi Italia tung hneăng lăm pôu rôh kố, Kăn xiâm hnê ngăn tơnêi têa ăm ‘nâi, péa pâ tối púi vâ ƀă mơ-eăm mơnhông tơrŭm cheăng kâ pơla péa tơnêi têa rế tơƀrê tâ nếo, rơdêi tâ ƀă tơƀrê tâ, veăng ‘no hnoăng a mâu tơdroăng pơkâ pêi tơdjuôm ‘na mơnhông krá tơniăn pê klêi mâu tơdroăng tung lâp plâi tơnêi tơdâng tơ ‘mô  ƀă tŭm péa pâ ai pơxúa, tí tăng tơmeăm khoăng ki ai hlâu dêi péa tơnêi têa, xua vâ pro pơxúa  ăm kuăn pơlê péa tơnêi têa, xua vâ hơniâp lĕm, tơrŭm ƀă mơnhông tơƀrê a kơpong ƀă tung lâp plâi tơnêi.