VOV4.Xơ Đăng - Hâi lơ 14/1, pôa Trần Quang Phương, Kăn xiâm phŏ hnê ngăn Kuô̆k hô̆i rơtế khu râ kăn pêi cheăng hiăng troh lăm pôu, rơkâu Têt kăn ƀô̆, mâu lêng a Trung đoân kan sát ki troh lâp lu peăng mâ luô pá hdroh tơnêi têa ƀă Lưh đoân tơbleăng tơdroăng kal 29, Kuân khu 9. Tơbleăng Kăn xiâm phŏ hnê ngăn Kuô̆k hô̆i rơtế khu râ kăn pêi cheăng, Thươ̆ng tă Nguyễn Tấn Phúc, Kăn pơkuâ Trung đoân Kan sát troh lâp lu peăng mâ hâi luô pá hdroh tơnêi têa tối ăm ‘nâi, troh nôkố, khu pơkuâ kan sat, kăn pơkuâ mâu râ dêi Trung đoân hiăng tơniăn ƀă chôa ‘lâng xông tơtêk; pơtối rak kơtăng khu cheăng ki đi đo pêi cheăng hbrâ vâ tơrŭm ƀă mâu tíu cheăng dêi Khu xiâm kŏng an, Kŏng an mâu kong pơlê tơplâ mơdât mâu tơdroăng xôi kân, tơleăng mâu tơdroăng ki nếo ai, pro ôh tá tơniăn tung gak kring, tơplâ mơdât mâu ngế xôi.

Xông tơpui a roh troh lăm pôu, pôa Trần Quang Phương, Kăn xiâm phŏ hnê ngăn Kuô̆k hô̆i pơchân tối tung la ngiâ Trung đoân Kan sat ki troh lâp lu peăng hâi luô pá hdroh tơnêi têa kal hlê plĕng ƀă pêi pro tơtro mâu Pơkâ dêi Đảng, Tơnêi têa, Khu râ kăn pơkuâ hnê ngăn cheăng Đảng kơvâ cheăng lêng Tơnêi têa, Đảng ủy Kŏng an Tơnêi têa, Khu xiâm pơkuâ Kŏng an ‘na hnoăng cheăng gâk kring, cheăng lêng.

La ngiâ rak tơniăn tung gak kring roh Têt Lo hơnăm nếo Nhâm Dần hơnăm 2022 tiô hnê mơhno dêi khu râ kăn pơkuâ mâu râ, pakĭng khu râ kăn pơkuâ kal rak ngăn ăm tơdroăng rêh ối ăm kăn ƀô̆, mâu lêng.

Katarina Nga tơplôu ƀă tơbleăng