‘’Ôh tá môi tuăn ƀă kăn pơkuâ pêi cheăng tiô troăng tơmeăm a hneăng cheăng, tơpui hên pêi iâ, pro mơdât tơdroăng mơnhông dêi tơnêi têa.’’ Kố cho rơkong tối rơdêi dêi pôa Tô Lâm, Kăn xiâm pơkuâ hnê ngăn Đảng, a Hneăng hôp mơ’no tơdrêng tung um tiô troăng hyôh măng mơgêi tơdroăng po rơdâ pêi pro Tơdroăng pơkâ kơxô̆ 57 dêi Khu xiâm kal kí ‘na pơhlêh tơmiât pêi rơkê tơkŭm po hâi lơ 15/10.

Ing rơkong tơpui tơno, pơkâ thế, pâ thế, Pôa Tô Lâm, Kăn xiâm pơkuâ hnê ngăn Đảng tối troăng tơmiât pêi, tơdroăng pêi pro Tơdroăng pơkâ kơxô̆ 57 cho ivá ki xiâm vâ pêi pro châ tơƀrê mâu tơdroăng châ tơƀrê hluâ pơkâ ton xŏn, pơhlêh troăng pêi mơnhông tơnêi têa, mơnhên troăng pêi tơtêk nếo dêi tơnêi têa. Kăn xiâm pơkuâ hnê ngăn Đảng pơkâ thế, mâu khu xiâm kơvâ cheăng kong pơlê thế xo tơdroăng cheăng tah lôi tíu ki kreăng pơkâ pêi pro hnoăng cheăng mơnhông má môi; hlâu lĕm ó rơdêi mơngế pêi cheăng pơlê pơla ăm mơnhông khoa hok, kŏng ngê̆, pơhlêh nếo tơmiât pêi rơkê, tiô pơkâ “Mâu ki klâi kơpong ngế krê chiâng pêi mê ôh tá xê kơvâ Tơnêi têa rak hnoăng ki xiâm mê pro tơ’lêi hlâu, mơhnhôk vâ kơpong ngế krê pêi’’.

Hiêm mơno thế xo tơdroăng ki môi tuăn ƀă loi tơngah dêi kuăn pơlê ƀă khu tê mơdró pro loăng rĕk; thế kơtăng pêi cheăng xúa kŏng ngê̆ tiô pơkâ, pêi pro mơ-éa cheăng kâ rêh ối ƀă tơnêi têa ‘’môi tíu – môi xôh chêh tối’’ ing kơmăi ‘măn ‘noăng chư chêh tơrŭm.