Tung mê, Tơdroăng chêh tơbleăng kal kí tơkŭm tơdâng 3  tơdroăng Tối tơbleăng (Tơbleăng kal kí, Tơbleăng cheăng kâ - pơlê pơla ƀă Tơbleăng tối mơgêi tâi tâng mâu tơdroăng mơjiâng Đảng) chiâng môi tơdroăng ‘mâi hơ’lêh tâi tâng môi, tŭm tơdroăng, nhên tơdroăng ki xiâm, ki kal, ‘nung ‘nâi, rĕng hlê, rĕng pâ, rĕng tơbleăng pêi pro.

Tơdroăng pêi pro tiô Pơkâ hneăng hôp 14 tối nhên “mâu ngế pêi pro, tơdroăng pêi pro, xiâm mơngế ki pêi, troh mơ’nui ti lâi’’ vâ tơbleăng pêi. Pôa Tô Lâm tối nhên: Xiâm ki vâ mơjâng, xiâm tơmeăm ai hlâu, ki rơdêi, ki nhoăm tung lâp plâi tơnêi dêi tơnêi têa ai môi tiah hâi kố cho ing tơkŭm tâi tâng tơdroăng pêi pro ing rơpâu hơnăm mơjiâng ƀă rak vế tơnêi têa; cho hnoăng pêi pro tơƀrê dêi 96 hơnăm mơjiâng ƀă mơnhông tơnêi têa ing hnoăng pơkuâ hnê mơhno dêi Đảng; cho tơdroăng ki hiăng pêi pro tơƀrê 40 hơnăm hơ’lêh nếo; cho ki mơ-eăm tơplâ hlâ rêh, piu dêi tơná dêi to lâi rơxông mâu lêng kăch măng, mâu đảng viên kŏng san, dêi kuăn pơlê, vâi pú hiăng kơhnâ pêi tung pêi chiâk, khên tơnôu tơplâ hlâ rêh.

‘Na pơkâ mơnhông tơnêi têa pơla hơnăm 2026-2030 ƀă mâ ngăn vâ pêi troh hơnăm 2045, Kăn xiâm pơkuâ hnê ngăn Đảng ăm ‘nâi, rak ki hơniâp lĕm, tơniăn; mơnhông rơdêi rĕng, krá rơdêi tơnêi têa; ‘mâi hơ’lêh ƀă mơnhông tơdroăng rêh ối kuăn pơlê; pơkuâ dêi tŭm tơdroăng, ing ivá tơná, loi khât, mơnhông rơdêi tung rơxông nếo dêi hdroâng mơngế. Mơ-eăm pêi châ tâk GDP sap 10% tung hơnăm tơngi klêng; pê lo liăn tâng riân rêm ko mơngế troh hơnăm 2030 châ dâng 8.500 USD.

Vâ mơhno mâu pơkâ, Hlá tơbeăng kal kí mơnhên 12 troăng hơlâ ki kân; 6 Tơdroăng cheăng ki kal ƀă 3 rôh pêi cheăng tơƀrê. Kăn xiâm pơkuâ hnê ngăn Đảng tối tiah kố, mot tung hneăng hôp kân 14, tơdroăng pơkâ pêi thế rơdêi, pêi rĕng, pêi troh tui lui. Ing hlá cơ ki lĕm dêi Đảng, tâi tâng, kuăn pơlê ƀă tâi tâng mâu lêng thế tơdjuôm ivá môi tuăn, rak tuăn loi, mơdêk hnoăng cheăng pêi, pơtối rak tuăn ngôa rơkê, tơbâ ki púi vâ; pro ăm rêm hơnăm, rêm khế, rêm hâi klêi kơ’nâi hneăng hôp kô tơƀrê, kô pơ’lêh khât; vâ kuăn pơlê hlo, Kuăn pơlê loi, Kuăn pơlê veăng môi tuăn, kuăn pơlê rơtế ƀă Kuăn pơlê xúa.