Teăng mâ kăn pơkuâ Đảng ƀă Tơnêi têa, pôa Nguyễn Phú Trọng khĕn kơdeăn ƀă mơnê mâu tơdroăng veăng kum kân dêi khu văn ngê̆ sih tơnêi têa, dêi Khu tơrŭm mâu Hội Văn học Nghệ thuât Việt Nam tung 75 hơnăm hdrối nah. Tối nhên tíu ối dêi Văn học Nghệ thuật, pôa Nguyễn Phú Trọng pơkâ thế, rêm râ pơkuâ Đảng, khu kăn pơkuâ sap ing Tơnêi têa troh kong pơlê kal hlê plĕng trâu hngế tâ nếo ‘na hnoăng cheăng, tíu ối ki kal dêi văn hoă, văn học nghệ thuật tung tơdroăng cheăng hơ’lêh nếo, mơjiâng ƀă rak vế Tơnêi têa; đi đo mơhnhôk, pro tơ’lêi hlâu má môi ăm mâu tơdroăng cheăng văn hoă, văn học nghệ thuật mơnhông.

Kăn xiâm pơkuâ hnê ngăn Đảng tơkôm ƀă tơngah tiah kố, tơdroăng văn học  nghệ thuật kăch măng Việt Nam rơtế ƀă khu văn ngê̆ sih pơtối mơdêk mâu tơdroăng ki hiăng pêi pro tơƀrê dêi văn hok, ngê̆ thuât 75 hơnăm hdrối nah, khŏm mơ-eăm tơkâ luâ mâu tơdroăng xơpá, pơloăng mơnúa vâ ai hên mâu ƀai chêh ki tơxâng ƀă kuăn mơngế ƀă Tơnêi têa Việt Nam ki ai rơpâu tơdroăng ki nhuô̆m kơnía, pêi pro châ tơdroăng ki hâk vâ tơkôm dêi kuăn pơlê.