Roh lăm pôu râ Tơnêi têa troh Việt Nam dêi pôa Cyril Ramaphosa, Kăn xiâm pơkuâ kong têa Nam Phi châ pói tơngah kô kum mơdêk râ tơrŭm cheăng pơla péa tơnêi têa, mơdêk tê mơdró pơla péa pâ, po rơdâ tơrŭm tung mâu kơvâ cheăng ki xiâm môi tiah pêi chiâk deăng, gâk kring tơnêi têa, kŏng ngê̆ ƀă hên kơvâ ki ê.

Tiô tối hdrối, tung roh lăm pôu pêi cheăng, pôa Cyril Ramaphosa, Kăn xiâm pơkuâ kong têa Nam Phi kô tơpui tơno ƀă pôa Lương Cường, Kăn xiâm hnê ngăn tơnêi têa pin ƀă mâu roh trâm mâ ki kal ƀă khu râ kăn pơkuâ râ xiâm Việt Nam. Kăn xiâm pơkuâ kong têa Nam Phi  xuân kô veăng leh kĭ tơkêa Khu lâp kong têa ‘na Hbrâ mơdât mơngế xôi ing troăng măng ối tối cho tơkêa Hà Nội.