Tiô pôa Nguyễn Văn Thắng, Ngế xiâm râng liăn ngân tối, vâ pêi pro mâu pơkâ ki Tơdroăng pơkâ mơ’no tung mơnhông mơdêk tơnêi têa hneăng hơnăm 2026 – 2030, ‘’tơkŭm pêi kêi đeăng tâi tâng, tơdâng tơ’mô troăng pơkâ pêi’’ châ mơnhên cho hnoăng cheăng ki xiâm. Ƀă kơvâ Liăn ngân, pêi kêi đeăng, pơkâ pêi cheăng kâ cho pơkâ vâ kơvâ pơtối pơhlêh nếo tuăn tơmiât, tơdroăng pêi pro. Pôa Nguyễn Văn Thắng tối nhên.

“Tơdroăng pơkâ tŭm tâi tâng teăm tơdrêng ƀă pêi pro châ tơƀrê mâu pơkâ dêi Đảng ‘na mơnhông mâu tơdroăng cheăng kâ, pêi pro tơdroăng pói vâ mơnhông mơdêk chiâng tơdroăng pêi pro ƀă châ tơƀrê inhên. Mơdêk vêh pơkuâ ƀă kơxô̆ liăn a mâu khu tê mơdró Tơnêi têa, mơdêk châ tơƀrê tơdroăng pêi pro ki má môi cho mơ’no liăn cheăng vâ tơniăn tơdroăng toi djâ rế tơniăn châ tơƀrê ki châ tơƀrê liăn ngân. Mơnhên ƀă mơnhông hnoăng pơkuâ dêi tơdroăng cheăng kâ Tơnêi têa. Mơnhông mơdêk cheăng kâ krê păng ‘nâng chiâng môi tơdroăng ki kal má môi dêi tơdroăng cheăng kâ. Tŏng gum po rơdâ kơchơ mơdró ăm tơdroăng cheăng kâ khu pú hên, khu tơrŭm cheăng’’.

-Tâi tâng a hngêi hôp kân Hneăng hôp má XIV dêi Đảng

Hneăng hôp má XIV pơ-tối mơnhên tơdroăng khŏm mơ-eăm kal kí hên dêi Đảng tung tơdroăng xo khôi túa lĕm tro ƀă kuăn mơngế a tíu xiâm dêi tơdroăng mơnhông mơdêk tơnêi têa. Kố ôh tá xê to tơdroăng ki rak pêi tiô túa ton troăng tơmiât dêi Đảng hluâ ing mâu rơxông kăch măng ƀă Pơhlêh nếo, mê ối cho troăng mơnhông mơdêk nếo tung troăng tơmiât pêi cheăng ton xŏn. Pôa Nguyễn Văn Hùng, Ngế xiâm pơkuâ Khôi túa lĕm tro Tơ’noăng ivá ƀă Ôm hyô tối 6 khu troăng vâ “Mơnhông mơdêk ivá tơtêk dêi khôi túa lĕm tro, kuăn mơngế Việt Nam – Xiâm kối mơnhông mơdêk rĕng ƀă krá tơniăn tơnêi têa tung chal nếo”.

“Pơhlêh nếo ó rơdêi tâi tâng troăng tơmiêt hlê plĕng ‘na mơnhông khôi túa lĕm tro, mơnhên mơ’no liăn cheăng ăm khôi túa lĕm tro cho mơ’no liăn mơnhông mơdêk krá tơniăn dêi tơnêi têa ăm tơdroăng la ngiâ dêi hdroâng mơngế. Kal mơdêk ivá dêi khu pêi khôi túa lĕm tro, tơdroăng kuăn mơngế tơdrêng mơjiâng ƀă djâ ki kơnâ khôi túa lĕm tro dêi rơxông nếo. Ngăn mơnhông kơmăi kơmok khôi túa lĕm tro ƀă cheăng kâ tơmiât pêi rơkê cho xiâm kối tơtêk nếo, gum tơdrêng tung tơtêk GDP’’.

Tiô pôa Y Thanh Hà Niê Kdăm, Kăn pơkuâ hnê ngăn Đảng ủi  Lâm Đồng, tơdroăng loi tơngah dêi Kuăn pơlê ƀă Đảng cho tơdroăng ki xiâm krá tơniăn vâ pêi pro ƀlêi trâng mâu pơkâ cheăng ton xŏn ki Đảng hiăng pơkâ mơ’no. Tung pơla Tơnêi têa dế mot tung hneăng mơnhông mơdêk nếo ƀă hên roh tơ’lêi hlâu ƀă  pơloăng mơnúa hên hĭn, vâ rak krá khu cheăng kal kí kơpong kuăn pơlê hdroâng kưan ngo, pôa Y Thanh Hà pơkâ tối:

‘’Thăm mơjiâng ƀă mơnhông hnoăng ki xiâm kal kí, ki málối cho mơngế ki kuăn pơlê loi tơngah tung hdroâng kuăn ngo, tơdroăng loi tĭng tiô khôp; ‘nâi tơdroăng kuăn pơlê. Hbrâ mơdât, tơplâ, mơdât mâu khu ki tơtrâ tơnêi têa, mâu ngế ki ‘nêk rơmêi tơnêi têa, khu ki mot pơlông djâ kuăn pơlê tơtrâ Đảng, Tơnêi têa pin. Pêi lĕm tro tơdroăng hbrâ, tơplâ, mơdât mâu khu ki tơtrâ tơnêi têa, mâu ngế ‘nhê tơnêi têa mot, pơlông djâ kuăn pơlê ‘nhê Đảng, Tơnêi têa. Pêi lĕm tro tơdroăng tơpui kâ Kuăn pơlê, ki má lối mơnhông khôi túa tơrŭm môi tuăn pơla mâu kong pơlê tơkăng ƀă  kong têa pú hmâ. Mơhnhôk kuăn pơlê rak ƀă mơnhông, rak vế khôi túa lĕm tro hdroâng kuăn ngo, rế rak khôi túa lĕm tro, pro krá khôi túa lĕm tro rế tơtêk tơdroăng tơrŭm môi tuăn hiâm mơno hâk tơngăm hdroâng mơngế, kố cho tơdroăng ki xiâm vâ tơtrâ mơdât mâu tơdroăng ki tơdjâk, ôh tá lĕm tro ing pakong môi tiah tơdroăng loi tĭng tiô khôp ki ôh tá lĕm, mâu ngế pro xôi tung tơnêi têa’’.

Hâk trâu má môi ƀă troăng tơmiât hnê mơhno: “Kuăn pơlê cho tíu xiâm, cho ki xiâm, cho pơkâ ƀă ivá tơtêk dêi tơdroăng mơnhông mơdêk’’ châ tối tung hlá mơ-éa ki kal Hneăng hôp, jâ Nguyễn Thị Thúy Lam, Kăn pơkuâ hnê ngăn Đảng ủi cheăm Tân Khánh Trung, kong pơlê Đồng Tháp tối, môi tơnêi rơdêi ôh tá xê châ vê mơnhên ƀă troăng pêi cheăng kâ lơ tơtêk GDP, mê ki kal tâ cho ƀă tơdroăng rêh ối, kơlo tơtêk hơniâp lĕm dêi kuăn pơlê. Tơdroăng ki mơnhông mơdêk bu păng ‘nâng ai kơnâ drêng rêm ngế kuăn pơlê pơrá châ rêh tung phâi hơtô, tơniăn krê ƀă hơniâp lĕm. Jâ Nguyễn Thị Thúy Lam tơpui tối:

‘’Mê cho tíu tơdroăng rêh ối kuăn pơlê châ tơniăn, tơniăn lĕm, rơkê. Kuăn pơlê ôh tá xê to bê kâ, bê xâp mê ối châ xúa tơdroăng khăm pơlât, hnê hriâm, khôi túa lĕm tro má môi; châ rêh tung tíu ki lĕm. Mê cho, tíu ai hnoăng achê kuăn pơlê, gum kuăn pơlê; môi khu pơkuâ tơnêi têa ‘nâi ‘’veăng gum drêng kuăn pơlê tô tuăn, tơdroăng hơniâp ro dêi kuăn pơlê’’. Mê cho, tíu ai pơlê pơla tơrŭm môi tuăn, tíu pơlê pâ dêi pó châ pro krá, mâu ki kơnâ khôi túa lĕm tro vâi krâ nah châ nhuô̆m ƀă rak vế’’.

Ing tơdroăng châ tơƀrê Hneăng hôp má XIV dêi Đảng, rêm kăn ƀô̆ đảng viên rơtế ƀă kuăn pơlê khŏm mơ-eăm pơhlêh troăng hơlâ, pơkâ dêi Đảng chiâng mâu tơdroăng pêi inhên, xo ki châ tơƀrê nôkố ƀă hơniâp lĕm dêi kuăn pơlê pro loăng rek kân má môi. Ing tơdroăng pêi kêi đeăng troăng pơkâ, mơnhông mơdêk tơtro mâu tơdroăng cheăng kâ, troh mơnhông ivá ó rơdêi khôi túa lĕm tro, kuăn mơngế ƀă pro krá khu cheăng kal kí a cheăm, tâi tâng pơrá tơmiât troh pơkâ mơjiâng môi tơnêi têa mơnhông rĕng, krá tơniăn, hên khôi túa lĕm tro ƀă hên tơdroăng loi tơngah. Kố cho xiâm kối ki kal vâ pêi pro tơdroăng mơnhông ‘na môi Việt Nam rơdêi, kro mơdrŏng, mơdêk tung chal mơnhông ki nếo.