Klêi xing xoăng, Khánh Hòa ối 246 tíu hnê hriâm tơnêi têa, kơdroh 482 tíu xiâm, tơ'mô kơdroh 66%. Hên hngêi trung châ tơkŭm po tiô túa hngêi trung xiâm, hngêi trung ki ê ƀă tíu hriâm, pro kơxô̆ lâm, hok tro a môi hngêi trung hên tâ hdrối. Mơgêi rôh pêi cheăng, pôa Phạm Ngọc Thưởng, Ngế xiâm phŏ ngăn hnê hriâm ƀă hnê mơjiâng tuăn ngôa rơkê pơkâ thế Vi ƀan kong pơlê ƀă kơvâ ngăn hnê hriâm ƀă hnê mơjiâng tuăn ngôa rơkê Khánh Hòa séa ngăn, kơdroh mâu rôh hôp, rôh tơ'noăng ki ôh tá kal, vâ thái cô mơdêk chôu hnê.

Kơvâ ngăn hnê hriâm pơtối mơdêk xing xoăng râ, xing xoăng hnoăng, pơ'lêh nếo túa pơkuâ ngăn. Ƀă mâu hngêi trung ki kân, kal mơdêk xúa kơxô̆, tơdroăng ƀă kŏng ngê̆ vâ tŏng kum pơkuâ ngăn, kơdroh tơdroăng cheăng ăm hngêi trung.