Tung pơla kố nah, kong pơlê Khánh Hòa ai hên pơhlêh inhên tung tơdroăng rơtế prôk ƀă khu tê mơdró, pro tơ’lêi hlâu mơdêk mơnhông cheăng kâ – rêh ối pơlê pơla. Ngoh Lê Thanh Vân, Phŏ Kăn pơkuâ Kŏng ti MiwaVina (Kơpong hngêi kơmăi kơmok Suối Dầu, cheăm Suối Dầu) tối, khu tê mơdró krâ kơvâ châ Khu pơkuâ Kơpong cheăng kâ, Kơpong hngêi kơmăi kơmok kong pơlê Khánh Hòa tŏng gum ‘mâi rơnêu mơ-éa phêp mơ’no liăn cheăng po rơdâ kân hngêi xươ̆ng cho rĕng, mơ-éa bro tung ton tung pơla 5 hâi:

“Khu tê mơdró dêi ngin cho khu tê mơdró krâ kơvâ ƀă kŭn, 100% kơxô̆ liăn kong têa ê. Khu pơkuâ lơ mâu kơ koan, kơvâ cheăng đi đo rơtế, hnê mơhno rêm mơ-éa rĕng lĕm, tro pơkâ luât. Kố cho tơdroăng ki kal, mơjiâng ivá mơhnhôk vâ mâu khu mơ’no liăn cheăng nếo tơmâng hên tâ’’.

‘Mâi pơhlêh pro mơ-éa a Khu pơkuâ Kơpong cheăng kâ, Kơpong Hngêi kơmăi kơmok kong pơlê châ mâu khu tê mơdró tung tơnêi têa ƀă kong têa ê kheăn kơdeăn hôm ‘nâng. Pôa Lê Hồng Phương, Phŏ Kăn pơkuâ Kơpong cheăng kâ, Kơpong Hngêi kơmăi kơmok kong pơlê Khánh Hòa tối ăm ‘nâi, pro mơ-éa ‘mâi rơnêu mơ-éa phêp mơ’no liăn cheăng châ pro ‘nâng ‘nâi sap ing 10 hâi chu u ối 5 hâi, la ngiâ, mơ-eăm u ối 3 hâi.

‘’Ngin kơjo ăm mâu khu mơ’no liăn cheăng a kơpong cheăng kâ tơkŭm, ki rơhêng vâ tối cho mâu khu mơ’no liăn cheăng ki má péa tung kơpong hngêi kơmăi kơmok vâ pro mơ-éa pêi pro tiô tro tơdroăng bu dâng 10 hâi nôkố bu u ối 5 hâi, cho drêng ki rĕng má môi, ngin kô kơdroh chu u ối 3 hâi. Ki kal má môi cho drêng khu tê mơdró nâp hô sơ, Khu thế séa ngăn ƀă hnê mơhno teăm tơdrêng vâ khu tê mơdró kêi đeăng, tơ’nôm, tơniăn hô sơ châ ki dâi lĕm’’.

Kong pơlê Khánh Hòa mơdêk mơjiâng on tơhrik ki vêh bro, tơmiât troh kơdroh kơnôm on tơhrik ing hoă thăch, tơniăn bê on tơhrik tơnêi têa ƀă mơnhông cheăng kâ ngiât, krá tơniăn. Troh khế 6/2025, Khánh Hòa hiăng ai 57 tơdroăng tơkêa bro on tơhrik vêh bro ƀă tâi tâng ivá vâ chê 3.750 MW, mê cho on tơhrik kơtâu ƀă khía, on tơhrik kơtâu ƀă mâ hâi, on tơhrik kơtâu ƀă têa ƀă on tơhrik kơtâu ƀă mâ hâi a kuâ hngêi, châ vâ chê 7% kơxô̆ on tơhrik ki vêh pro lâp tơnêi têa.

Ki rơhêng vâ tối kơpong Peăng kơnhŏng kong pơlê mơnhông rơdêi mâu tơdroăng tơkêa bro kân môi tiah Hngêi kơmăi Nhiêt điê̆n BOT Vân Phong 1 ƀă ivá 1.320 MW, veăng kum dâng 3% kơxô̆ on tơhrik tơnêi têa. A kơpong peăng Hdroh, mâu grup pơkuâ kân môi tiah MW, veăng gum dâng 3% kơxô̆ on tơhrik tơnêi têa. A kơpong peăng hdroh, mâu grup pơkuâ kân môi tiah BIM, Trung Nam hiăng mơ’no rơpâu rơtal liăn tung tôh hôp on tơhrik kơtâu ƀă mâ hâi, on tơhrik kơtâu ƀă khía tơdjêp mơjiâng po krúa, xúa rơkê tơnêi ki khăng khoăng.

Kong pơlê Khánh Hòa mơnhên on tơhrik cho 1 tung 4 trăng ki xiâm tơtêk ki xiâm, châ pơkâ chiâng tíu xiâm on tơhrik tơnêi têa ƀă tâi tâng ivá tiô tối hdrối 14.000 MW a hơnăm 2030, tá on tơhrik kơtâu ƀă mâ hâi, on tơhrik kơtâu ƀă khía, on tơhrik kơtâu ƀă hyôh ƀă on tơhrik kơtâu ƀă trếo tik nik. Kong pơlê dế mơdêk rĕng tơdroăng tơkêa bro ki xiâm môi tiah Hngêi kơmăi on tơhrik Ninh Thuận, on tơhrik Bác Ái, LNG Cà Ná...

Tơdrêng amê tơkŭm kêi đeăng troăng kơxái on tơhrik, tơbleăng troăng hơlâ kơjo mơ’no liăn cheăng, mơhnhôk tơdroăng môi tuăn dêi kuăn pơlê vâ pêi pro mâu pơkâ mơjiâng on tơhrik ngiât, krúa lĕm, krá tơniăn.

Pôa Hồ Xuân Ninh, Kăn pơkuâ Khu pơkuâ Kơmăi kơmok tê mơdró kong pơlê Khánh Hòa tối ăm ‘nâi, on tơhrik tơniăn ôh tá xê veăng kum pêi lo liăn ăm tơnêi têa mê ối pro tơ’lêi hlâu vâ kong pơlê kơbông krếo mơ’ni liăn cheăng mâu tơdroăng tơkêa bro mơjiâng kơmăi kơmok nếo:

‘’Kal khâ tơbleăng tuá pơkâ pêi roh kơjo mâu kơvâ cheăng, kơvâ ai ki kơnâ tâk hên, kŏng ngê̆ rơkê, lĕm ƀă kong prâi, tơmeăm ai ham lươ̆ng khoa hok – kŏng ngê̆ rơxông nếo, veăng kum mơdêk kơxô̆ liăn châ xo ăm tơnêi têa. Kơpong kơmăi kơmok môi tiah Dốc Nắng, Trảng É, lơ Cà Ná 1 xuân hiăng rah xo châ mâu khu mơ’no liăn cheăng ai pơkâ mơ’no liăn pro hngêi trăng, troăng klông tơdâng tơ’mô, rĕng mơhnhôk mâu tơdroăng tơkêa bro ki má péa’’.

Hngêi trăng, troăng klông vâ pêi cheăng ton xŏn châ mơ’no liăn, tíu mơ’no liăn cheăng châ pro tơniăn; kơmăi kơmok bro, on tơhrik vêh pro, ôm hyô – mơdró pro tơniăn rĕng cho tơdroăng ki kal vâ Khánh Hòa tơtêk rĕng mơnhông cheăng kâ, mơdêk tơdroăng rêh ối kuăn pơlê. Klêi kơ’nâi tơmot chiâng môi kong pơlê, po rơdâ tíu mơnhông mơdêk, Khánh Hòa pơtối châ pơkâ pêi troh hơnăm 2030 chiâng pơlê kong kân ối tung Tơnêi têa, tơtêk cheăng kâ 12%/hơnăm, pêi lo liăn tơdâng tâk 14%/hơnăm. Pôa Trần Quốc Nam, Kăn hnê ngăn Vi ƀan kong pơlê Khánh Hòa tối ăm ‘nâi:

‘’Đảng ƀô̆, Vi ƀan kong pơlê mơnhên, pro phuâng mâu tíu ki kreăng kân ‘na tơdroăng pơkâ ƀă hngêi trăng troăng klông, ki rơhêng vâ tối cho mâu tơdroăng tơkêa bro ki tá hâi pêi pro; tơkŭm mơnhông mơdêk tơdâng tơ’mô hngêi trăng, troăng klông ƀă hngêi trăng troăng, klông kơpong hngêi kơmăi kơmok, mơjiâng ivá tơtêk nếo. Mơdếk mơnhông pŭn trăng ki xiâm tơtêk mê cho kơmăi kơmok – on tơhrik, ôm hyô – mơdró ƀă tíu rêh ối cheăng kâ tiô rơxông nếo; mơdêk rĕng tơdroăng pơhlêh xúa kŏng ngê̆, tơmiât troh pơkâ cheăng kâ xúa kŏng ngê̆ châ 1/3 tâi tâng tơmeăm a hơnăm 2030’’.