Khu Kŏng ti pêi cheăng tiô rơnó môi khu Mặt trời Phú Quốc ƀă Kŏng ti pêi cheăng tiô rơnó Mặt trời Hạ Long châ pơcháu pêi pro Tơdroăng tơkêa bro Kơpong tíu kơdrâm kuăn pơlê rêh ối tê mơdró nếo Đầm Môn ƀă Kơpong tíu kơdrâm kuăn pơlê rêh ối tê mơdró nếo Tu Bông ƀă tâi tâng kơlo liăn mơ’no lối 65.300 rơtal liăn. Tŭm péa tơdroăng tơkêa bro tơdjêp hngêi ối, tê mơdró, ôm hyô, hnê hriâm, khăm pơlât, loăng kong, kơdrum reăng ƀă hngêi trăng troăng klông tơdâng tơ’mô. Hâi khế pêi cheăng cho 50 hơnăm sap ing hâi pơcháu tơnêu; tiô tối hdrối pơxiâm mơjiâng pro sap hơnăm 2025 ƀă kêi đeăng a mơ’nui hơnăm 2034.

Pôa Trần Minh Chiến, Kăn pơkuâ Khu pơkuâ cheăng kâ ƀă mâu kơpong Kơmăi kơmok kong pơlê Khánh Hòa tối ăm ‘nâi, péa tơdroăng tơkêa bro kô ko kum djâ Kơpong cheăng kâ Vân Phong chiâng tíu xiâm mơdró, tê mơdró, ôm hyô, tơdrêng amê pêi pro troăng hơlâ ki phá tơ-ê ki Kuô̆k hô̆i hiăng ‘măn ăm Khánh Hòa.