Tiô pơkâ, tơdroăng tơkêa kố kô châ ‘no liăn pro tiô tơdroăng cho ngế pêi cheăng tơdjuôm krê, tơkêa BOT ai kơxô̆ liăn Tơnêi têa veăng gum. Troăng kân Nha Trang – Đà Lạt xŏn lối 80km, tíu apoăng cho tơkoh ƀă troăng kân Bắc-Nam a cheăm Diên Thọ, Khánh Hòa, tíu mơ’nui tơkoh ƀă troăng kân Liên Khương – Prenn a bêng Xuân Hương, kong pơlê Lâm Đồng.

Troăng kố châ kơchuâ chêh pro ki têi 80-100km/chôu, ăm pŭn toăng rơxế kơtâu, tâi tâng kơxô̆ liăn pro dâng 25 rơpâu rơtal liăn. Hâi khế hbrâ vâ pro cho sap ing hơnăm 2024 troh 2025, tiô tối hdrối pro tung pơla hơnăm 2026-2028. Tơdroăng ki pro troăng kân Nha Trang - Đà Lạt ôh ti xê pêi pro tiô tơdroăng vâ prôk lăm, pơto chơ tơmeăm rêm hâi, mê ối po ăm rôh vâ mơnhông nếo ăm péa to kong pơlê ôm hyô kân má môi dêi tơnêi têa, pro ivá mơnhông krá tơniăn ăm tá kơpong Nam Trung Bộ ƀă Tây Nguyên.