Tiô Vi ƀan hnê ngăn kong pơlê Khánh Hòa tối, 9 khế hơnăm kố, cheăng kâ liăn ngân dêi kong pơlê pơtối tâk tơniăn, GRDP châ dâng 7%. Mâu kơvâ cheăng pêi chiâk, kơmăi kơmok, tê mơdró pơrá rak ivá mơ’nhông tơƀrê. Nâp liăn Tơnêi têa luâ túa pơcháu. Mâu kơvâ mơjiâng pro, tê mơdró dế hlo ‘mâi mơnhông nhên. Khu mơdró kâ tung kong pơlê xuân hbrâ rơnáu tâ tung tơdroăng cheăng dêi kong pơlê pro pơhlêh tơdroăng vâ roê xúa kế tơmeăm, kơdroh tơdroăng ki tơkôm tung tơdroăng roê ‘mot kế tơmeăm ing tíu ê mot tung kong pơlê.

Khánh Hòa hiăng têa tah klêi mâu pơtân xi kơchoh, po rơdâ troăng hơlâ tŏng gum pro hngêi ối pơlê pơla ăm mâu ngế ki pêi lo liăn iâ ƀă mâu kŏng nhân. 3 tơdroăng pơkâ tơnêi têa pơrá pêi châ tơƀrê, veăng gum pro pơhlêh troăng klông ƀă tơdroăng rêh ối kơpong hơngế hơngo.

Tiô pôa Nguyễn Khắc Toàn, Kăn ngăn Vi ƀan kong pơlê Khánh Hòa, pakĭng mâu tơdroăng ki kal, kong pơlê xuân ôh tá iâ tơdroăng ki xơpá. Tung mê, xoăng liăn pêi cheăng bu nếo châ lối 44%, xua tơvâ ‘na tơnêi ƀă tro tơdjêp túa pơkâ klêi kơ’nâi ‘mot tơkŭm tíu pêi cheăng. Kố xuân cho tơdroăng ki kong pơlê dế tơkŭm tŏng gum:

“Ngin kal ‘nâi plĕng vâ tŏng gum mâu tơdroăng tơkêa bro ki xơpá, tơvâ, ngin hiăng xing xoăng mâu pú lăm séa ngăn ai mâ đi đo Vi ƀan hnê ngăn kong pơlê pơkuâ tơrêm tíu, rêm kơvâ cheăng. Tơkŭm hôp đi đo, hnê mơhno kơtăng, tŏng gum teăm tơdrêng tung la ngiâ. Tơngah ƀă mâu tơdroăng pêi pro mê, mơ-eăm ‘mâi mơnhông ki xơpá, rak vế tơniăn tơdroăng ki mơnhông”.

Pôa Nguyễn Hải Ninh, Ngế xiâm ngăn tơdroăng ki chêh pro luât mơnhên tối khât ivá mơ-eăm dêi kong pơlê Khánh Hòa tung hnê mơhno-pơkuâ, ‘mâi mơnhông mơjiâng pro, mơdêk rơdêi pơhlêh kơxô̆ tung tơdroăng cheăng tơdjuôm ƀă xúa KPI tung mơnhên tối, pơkuâ ngăn kăn ƀô̆.

Pôa Nguyễn Hải Ninh tối rơdêi, klêi kơ’nâi ‘mot tơkŭm, Khánh Hòa ai tơnêi tơníu mơnhông mơdêk kân rơdâ, ƀă mâu kế tơmeăm ki ai hlâu ƀă pơxúa dêi kong pơlê ki lâi ai, môi tiah têa kơxĭ xŏn má môi lâp tơnêi, troăng kân, tơraih tơƀai, tíu pêi cheăng on tơhrik ƀă ôm hyô tơxâng ƀă tơnêi têa. Xua mê, Khánh Hòa kal rế tŏng gum rĕng mâu tíu ki ối xơpá vâ pêi châ mâu tơdroăng pơkâ pêi thăm mơnhông 8,1% tung plâ hơnăm 2025, rế pêi pro tơƀrê mâu pơkâ ‘na troăng hơlâ tŏng gum, malối cho pro mơnhông tơƀrê ăm tá hneăng pêi cheăng. Pôa Nguyễn Hải Ninh, ngế xiâm ngăn tơdroăng chêh pro luât tối:

“Hiăng ai mâu khu ki ‘no liăn pêi cheăng kân troh a Khánh Hòa. Laga athế ‘nân ối vâ séa ngăn mâu tơdroăng tơkêa bro a Kơpong kơphô̆, kơpong ki ôh tá ối tung kơphô̆ ôh tá êa nâp hnoăng liăn mơhá môi tiah lâi? Kal ai troăng hơlâ pêi pro môi tiah lâi? Kơpong tê mơdró hmâng vâ môi tiah lâi? Mơnhông tơƀrê môi tiah lâi? Tâng ôh mâu khu ki ‘no liăn cheăng kô pêi tiô pơkâ môi tiah hmâ, kô ôh tá pêi mơdêi, pơkâ troăng tơmiât dêi kong pơlê tro ƀă troăng tơmiât dêi tơnêi têa”.

Ƀă ki ai hlâu, ki pơxúa hiăng ai hlâu ƀă tơdroăng veăng gum kơtăng dêi khu pơkuâ tơdroăng kal kí, Khánh Hòa dế ối tung tơdroăng ki tơ’lêi hlâu mơnhông tơƀrê rơdêi, chiâng tíu xiâm cheăng kâ têa kơxĭ, ôm hyô ƀă tê mơdró rơkê plĕng dêi kơpong Nam Trung Bộ. Mâu tơdroăng tơhrâ tŏng gum, lêi tah mâu tơdroăng ki xơpá sap ing mâu khu xiâm, kơvâ cheăng Tơnêi têa châ tơngah kô pro tơ’nôm ivá vâ Khánh Hòa pêi pro tơdroăng pơkâ pêi thăm mơnhông 8,1% tung hơnăm 2025.