Tung 9 khế dêi hơnăm 2025, tâi tâng kế tơmeăm hlo tâk tâng vâ pơchông ngăn tơdjuôm dêi Khánh Hòa tâk 7%, ối má 26/34 to kong pơlê, pơlê kong kân tung lâp tơnêi têa ƀă ối má 4/6 tung kơpong kĭng têa kơxĭ Pêa hdroh Tơdế Tơnêi têa - Tây Nguyên; tâi tâng kơxô̆ liăn châ xo tiô riân lối 28.800 rơtal, luâ 3% Tơnêi têa pơcháu, tâk vâ chê 50% tâng vâ pơchông ƀă khế kố hơnăm nah.

Ôm hyô ƀă tê mơdró pơtối cho kơvâ cheăng ki xiâm, tơdah lối 14,1 rơtuh ngế tơmối, tung mê ai 4 rơtuh 300 rơpâu ngế tơmối kong têa ê, kơxô̆ liăn châ xo lối 56.500 rơtal liăn, tâk vâ chê 20% tâng vâ pơchông ƀă khế kố hơnăm 2024.

A Rôh hôp, pôa Nghiêm Xuân Thành, Kăn pơkuâ ngăn Đảng Khánh Hòa tối nhên: Khánh Hòa athế tơkŭm mâu kơxô̆ liăn ki kal vâ pêi, tơmiât troh pêi mâu tơdroăng tơkêa bro ivá, troăng klông tung la ngiâ vâ pêi châ tơƀrê ƀă pêi châ luâ tơdroăng mơnhông lối 8%, tơdrêng amê hlối tŏng gum 246 tơdroăng tơkêa bro ối tro tơvâ, pro phuâng kơxô̆ liăn pêi cheăng dế tro pơtê. Pôa Nghiêm Xuân Thành xuân pơchân tơdroăng ki tơbleăng túa pơkâ dêi kong pơlê Khánh Hòa nếo kal châ pêi pro tro khât vâ pro xiâm ăm mâu túa pơkâ mơnhông pro mâu tơmeăm khoăng.