Tơdroăng tơkêa bro kân rơdâ vâ chê 290 ha, pơxiâm mơjiâng pro tung dế khế 8, troh nôkố hiăng tăng châ lối 116 ha tơnêi. Khu mơ’no liăn cheăng hiăng châ ăm hnoăng xúa lối 66ha tơnêi, tŭm tơdroăng vâ mơjiâng pro hneăng apoăng. Laga, tơdroăng chêl xuân ối trâm pá xua hdi tơkăng dêi pó, ôh tá ai hô sơ tro luât ƀă tơdroăng kuăn pơlê vâi mơjiâng xêh tơkôm chêl liăn.

Viglacera tơkêa kơdroh ‘nâng ‘nâi tơdroăng mơjiâng pro môi hơnăm, pơxiâm mơjiâng pro rơtế môi xôh sap ing khế 11, troh pái khế apoăng hơnăm la ngiâ kêi đeăng 50 ha tơmeăm khoăng tơdâng tơ’mô vâ pơcháu ăm khu mơ’no liăn cheăng ki pơtối vêh tê rôe. Drêng kêi đeăng, kơpong hngêi kơmăi kơmok kố cho tơmeăm mơnhông kơmăi kơmok kŏng ngê̆ rơxông nếo, logistics ƀă tíu kơdrâm kuăn pơlê rêh ối tŏng gum tơ’nôm kơpong Vân Phong, mơjiâng cheăng pêi, mơhnhôk kơxô̆ liăn mơ’no tung tơnêi têa ƀă kong têa ê, kum djâ kŏng ngiê̆p vêh hnoăng ki xiâm dêi kong pơlê.