Hâi lơ 10/9, a rôh pêi cheăng ƀă Vi ƀan hnê ngăn kong pơlê Khánh Hòa, pôa Hồ Văn Niên, Phŏ ngế xiâm pơkuâ Khu ngăn Hdroâng kuăn ngo ƀă Tơdroăng tiô khôp tối nhên pơkâ thế pêi pro tơdrêng cho thăm mơnhông pơkuâ ngăn tơnêi têa ‘na tơdroăng cheăng hdroâng kuăn ngo, tơdroăng tiô khôp, rak vế túa ki pơkuâ rơkê plĕng tiô pơkâ kăn pơkuâ kong pơlê péa râ, tro ƀă hnoăng cheăng mơnhông tơdroăng rêh ối, kơdroh kơtiê krá ton ăm kuăn pơlê hdroâng kuăn ngo. Klêi kơ’nâi ‘mot tơkŭm ƀă Ninh Thuận, kong pơlê Khánh Hòa nếo ai lối 2,2 rơtuh ngế kuăn pơlê. Kong pơlê ai 36 hdroâng kuăn ngo ƀă 290 rơpâu ngế, châ lối 13% pơ’leăng mâ mơngế tung lâp kong pơlê; ai 12 tơdroăng khôp ƀă vâ chê 900 tíu khôp, 650 rơpâu ngế tiô khôp ƀă vâ chê 8.800 ngế mâu ƀok xối, yah chĭng, mâu ngế cheăng tung mâu hngêi khôp, khu ki hriâm vâ pro ƀok xối yah chĭng.

Mâu hơnăm hdrối, Khánh Hòa tơmâng ngăn troh tơdroăng ‘no liăn mơnhông kơpong hdroâng kuăn ngo. Pơla hơnăm 2021 – 2025, kơxô̆ rơpŏng kơtiê tung kơpong kơdroh lối 5% rêm hơnăm. Kong pơlê hiăng pêi pro klêi tơdroăng ki têa tah hngêi pơtân, xi kơchoh rĕng tâ 4 khế tâng vâ pơchông ƀă túa pơcháu, ƀă 3.500 toăng châ pro nếo ƀă ‘mêng hngêi ki ton.