Hôp tơpui tơno tơkŭm vâ chê 50 ngế cheăng khoa hok ƀă lối 30 tham luâ̆n ing Mih, Hàn Quốc, Ý, Malaysia, Singapore. Mâu ngế ki rơkê tối, vâ mơnhông ki tơ’lêi, Khánh Hòa kal môi tíu xiâm hriăn plĕng kŏng ngê̆ têa kơxĭ kân tiô rơxông nếo, ai hnoăng ki xiâm rơtế tơmiât pêi rơkê, tơdjêp Tơnêi têa, khu tê mơdró, mâu ngế hriâm rơkê ƀă pơlê pơla.

Kăn pơkuâ Vi ƀan kong pơlê Khánh Hòa mơnhên hôp tơpui tơno cho roh vâ kong pơlê rơtế mâu ngế cheăng khoa hok, khu tê mơdró ƀă pơlê pơla rơtế mơjiâng troăng pêi, mơnhên tơdroăng tơdjêp krá tơniăn pơla khu râ kăn pơkuâ ƀă tơdroăng hriâm tung pêi pro mâu troăng hơlâ mơnhông cheăng kâ têa kơxĭ. Mâu tham luâ̆n, tơpui veăng kum mơjiâng xiâm kối nếo, kum Khánh Hòa chiâng kơpong tơtêk krá tơniăn, tơtro pơla tơdroăng rêh ối kơpong têa kơxĭ ƀă kŏng ngê̆ tiô rơxông nếo.