Vi ƀan kong pơlê Quảng Ngãi hiăng hôp tối ‘na tơdroăng mơjiâng hngêi trung phôh thong ai tíu kâ koi ối pơtê tơdjêp râ a mâu cheăm tơkăng kong. Klêi kơ’nâi séa ngăn, Khu pơkuâ Hnê hriâm ƀă Hnê mơjiâng kong pơlê Quảng Ngãi pơkâ thế Vi ƀan kong pơlê pơkâ rah xo 4 cheăm, mê cho Dục Nông, Mô Rai, Sa Loong, Rờ Kơi vâ mơ’no liăn 4 hngêi trung hriâm. Mâu kơpong kố ai cheăng kâ, rêh ối pơlê pơla pá puât, tơnêi rơnâk, troăng klông ôh tá lĕm, kuăn pơlê iâ êt, ki hên cho kuăn pơlê mơngế Rơteăng, Bơhnéa, Giẻ Triêng.

Kong pơlê kô mơjiâng nếo 2 toăng hngêi trung ƀă rơnêu, pro lĕm 2 hngêi trung. Tâi tâng kơlo mơ’no liăn lối 600 rơtal liăn. Hơnăm 2025 kong pơlê xing xoăng dâng 117 rơtal liăn mơ’no mâu kơxô̆ liăn vâ mơjiâng. Pôa Nguyễn Hoàng Giang, Kăn hnê ngăn Vi ƀan kong pơlê Quảng Ngãi pơkâ mâu kơ koan, tíu cheăng ki tơdjâk hbrâ pêi pro ƀă xing xoăng tơdroăng châ pơcháu, khŏm mơ-eăm mơjiâng mâu hngêi trung hriâm a hâi lơ 15/11 la ngiâ, kêi đeăng a khế 7/2026.