Kơhâi dế lơ 20/7, a cheăm Ia Ko, kong pơlê Gia Lai, Hă sih Kpă Thiệp, mố đô̆i Trung đoân 28 (Sư đoân 10, Kuân đoân 34) tung rôh pâ pơtê pôu dêi rơpŏng hngêi lăm a chiâk vêh hlo 2 ngế kuăn pơlê tro on tơhrik hrik. Ôh tá xâu rơ-iêo, ngoh kơtâu mot tung tíu ki rơ-iêo toi xo prế ki mê lo pa gong, mê ngoh hlối kơtong hlâ long. Tơdroăng pêi pro khên tơnôu mê dêi hă sih Kpă Thiệp hiăng gum 2 ngế châ tŏng rêh, la ngoh hiăng hlâ xua tơdjâk troh plâi nuih.

Mơnhên tơdroăng ki khên tơnôu mê, Vi ƀan hnê ngăn cheăm Chư Sê hiăng diêp Mơ-éa khĕn kơdeăn, tơdrêng amê kăn pơkuâ cheăm Ia Ko hiăng pơkâ thế kong pơlê diâp Ƀâng khê̆n kơdeăn ăm ngoh. Vâ teăm tơbleăng tơdroăng ki châi heăng kân kố, kăn ƀô̆ ƀă mố đô̆i tung tâi tâng Kuân đoân 34 hiăng tơbleăng thế veăng tơlo liăn tŏng gum rơpŏng hă sih Kpă Thiệp, pro tơ’nôm lĕm um méa dêi “Mố đô̆i Pôa Hồ”.