Mơnhên tơrŭm cheăng péa tơnêi têa xuân ối hên tơnêi ki rơlối ƀă tơmeăm mơnhông kân vâ po rơdâ tơrŭm păng ‘nâng, châ tơƀrê hên tâ, pôa Lê Minh Hưng, Ngế pro xiâm hnê ngăn tơnêi têa pơkâ thế péa pâ tơrŭm krá tơniăn vâ mơdêk tơrŭm cheăng tung la ngiâ. Ki xiâm cho thăm tơpui tơno mâu râ, kơjo po hên mâu roh lăm pôu dêi Khu râ kăn pơkuâ râ xiâm; pơkâ thế peăng Canada pơtối lôu péa kơchơ mơdró ăm tơmeăm khoăng Việt Nam, ki má lối cho tơmeăm pêi lo ing chiâk deăng, loăng kong, ká xi xŏng.

Tơdrêng amê, mơhnhôk khu tê mơdró Canada mơdêk mơ’no liăn cheăng a mâu tơdroăng tơkêa bro ki xiâm ‘na on tơhrik vêh bro, cheăng kâ kruá lĕm kong prâi ƀă cheăng kâ têk chu chu têk. ‘Na peăng dêi tơná, pôa Mark Carney, Ngế pro xiâm hnê ngăn tơnêi têa mơnhên Việt nam cho khu tơrŭm cheăng ki kal ki xiâm a kơpong ASEAN ƀă Ấn Độ Dương – Thái Bình Dương.

Péa tơnêi têa kal tối hên tơdroăng ki pơxúa tơdjuôm tung tơdroăng ki loi tơngah kal kí, tê mơdró – mơ’no liăn cheăng ƀă trâm mâ pơla kuăn pơlê trâu hơngế; peăng Canada tơkêa rơtế Việt Nam mơdêk tơrŭm cheăng rế hía rế mơnhông mơdêk.