Vâ mơnhên tối ki khât ‘na klêi kơ’nâi tơbleăng ƀă pêi pro pơhlêh nhên mâu pơkâ kân dêi Tơnêi têa tung tơdroăng rêh ối pơlê cheăm, pơla hdrối kố nah, Khu ngăn Hdrông kuăn ngo Hô̆i đong hnê ngăn kong pơlê Dak Lak hiăng po rôh lăm ngăn khât a mâu túa pơkâ pro ôm hyô pơlê pơla a kong pơlê. Khu ki lăm ngăn hiăng pêi cheăng tơdrêng a ƀuôn Kli A (bêng Buôn Hồ), ƀuôn Tuôr (cheăm Hòa Phú), ƀuôn Tơng Jú (cheăm Ea Kao) ƀă ƀuôn Akŏ Dhông (bêng Buôn Ma Thuột).

Klêi lăm ngăn ăm hlo, troăng hơlâ tŏng gum dêi kong pơlê hiăng pro ivá mơnhông ki kal gum kuăn pơlê hbrâ rơnáu tăng mâu liăn ngân, po rơdâ ‘no liăn cheăng ƀă mơjiâng pro hên kế tơmeăm vâ pro ôm hyô tro ƀă túa lĕm tro chal krâ, cheăng pêi ƀă kŏng, tăng cheăng pêi tơniăn ăm vâi krâ kuăn pơlê. Kố cho tơdroăng ki mơhno nhên ăm cheăng pơhlêh túa lĕm tro chiâng kơxô̆ liăn pêi lo mơnhông tro tiô pơkâ, tơmiât tro tiô troăng prôk xiâm dêi Pơkâ 80.

Laga, vâ pơtối pơhlêh tơƀrê mâu tơdroăng hnê mơhno dêi Khu xiâm ngăn cheăng kal kí ‘na rak vế túa lĕm tro tung hneăng nếo, mâu cheăm bêng pâ thế kong pơlê kal pơtối mơdêk troăng tŏng gum. Ki xiâm cho gum rak vế túa lĕm tro, hnê tơdroăng ki rak ngăn ƀă mơdêk rơdêi tơrŭm cheăng kơpong. Pôa Y Kle Knul, Phŏ ƀơrô cheăng Túa lĕm tro cheăm Hòa Phú tối:

 “Kal pơtối tơmâng ngăn tŏng gum mâu liăn ngân rak vế hngêi trá xŏn chal krâ, cheăng tĕn ếo pơtâk chal krâ, tơdroăng mơhno túa lĕm tro tŏn chêng koăng, mâu tơdroăng po mơdĭng chal krâ vâ mơjiâng tơmeăm chôu vế krâ túa lĕm tro kong pơlê. Thăm mơnhông cheăng pơkâ mơdêk ‘no liăn, mơđah tơbleăng, mơjiâng pro tour tơrŭm Ƀuôn Tuôr ƀă mâu tíu troh ôm hyô a kong pơlê vâ po rơdâ tíu ôm hyô ăm tơmối ƀă mơdêk ki tơƀrê tung tí tăng mâu tơmeăm ôm hyô pơlê pơla”.

Tiô Khu ngăn Hdrông kuăn ngo Hô̆i đong hnê ngăn kong pơlê Dak Lak, tơdroăng ki tơbleăng Pơkâ 80 pâ thế kuăn pơlê athế cho ngế ki xiâm veăng ƀă pơxúa sap ing mâu tơdroăng ki kơnía ‘na túa lĕm tro dêi tơná. Mâu rơkong tơmâng xo chêh tối sap ing ki ai khât kô cho tơdroăng ki kal vâ kong pơlê chêh pro klêi troăng hơlâ tŏng gum, mơdêk mâu troăng hơlâ tŏng gum mơjiâng pro. Tối nhên ‘na hvêa chêng prôk ki pơtối cho vâ ăm Pơkâ dêi Đảng châ mot tung tơdroăng rêh ối, jâ Đỗ Thị Như Tình, Ngế pơkuâ Khu ngăn hdrông kuăn ngo Hô̆i đong hnê ngăn kong pơlê Dak Lak ăm ‘nâi:

 “Khu ki lăm ngăn hiăng chêh xo mâu rơkong tối tơbleăng khât dêi kuăn pơlê tung pơla tơbleăng pêi pro pơkâ ƀă mâu troăng hơlâ tŏng gum a kong pơlê. Tung tơdroăng mê kô hriăn ngăn pơkâ mơ’no tơbleăng pêi môi pơkâ nếo ‘na mơjiâng pro ôm hyô pơlê pơla tro ƀă rak vế ƀă mơnhông túa lĕm tro tung hneăng nếo gá kô pro pơxúa tơƀrê tâ”.

Tơdroăng ki rĕng hriăn ngăn, chêh pro túa Pơkâ nếo dêi Hô̆i đong hnê ngăn kong pơlê tro ƀă ki ai khât cho hvêa chêng prôk ki nhên, pơkâ kơtăng vâ ăm Pơkâ 80 dêi Khu xiâm ngăn cheăng kal kí châ mot trâu hngế; pro ăm túa lĕm tro Tây Nguyên chiâng ivá mơnhông cheăng kâ rêh ối pơlê pơla mơnhông tơƀrê ăm Dak Lak tung la ngiâ.