Khĕn kơdeăn ki hbrâ ƀă mơ-eăm dêi mâu lêng, kŏng an ƀă mâu kăn cheăm bêng tung tơdroăng djâ tâi tâng vâ chê 1.700 ngế kuăn pơlê lo ing kơpong rơ-iô, Phŏ Ngế pro xiâm hnê ngăn tơnêi têa pâ thế mâu tíu pêi cheăng tăng ngăn nhên tung kong pơlê, pôi tá ăm kuăn pơlê vêh ối nếo a tíu ki ôh tá tơniăn drêng kong ối mêi hâi tơniăn. Ƀă troăng hơlâ ‘mâi mơnhông ton troh ta ah, kong pơlê Lai Châu pâ thế Tíu xiâm séa ngăn kơjo kum liăn xĕn kuăn pơlê tơdrêng dâng 200 rơpŏng kuăn pơlê lo ing kơpong ki rơ-iô tơ’lêi tơnêi tơhnâp.

Pakĭng kơxô̆ liăn kơjo gum ing Tơnêi têa, Phŏ Ngế pro xiâm hnê ngăn pâ thế Vi ƀan Măt trâ̆n tơnêi têa Việt Nam rơtế ƀă mâu khu tơrŭm cheăng kơhnâ krếo thế, mơhnhôk tăng hên liăn ing pơlê pơla; thâ hbrâ mâu tơmeăm xúa tung rêh ối rêm hâi, kum kuăn pơlê kơpong têa lân lu Mường Than rĕng tơniăn tung rêh ối.