VOV4.Xơ Đăng - Hâi lơ 10/10, Khu kăn Kuô̆k hô̆i kong pơlê Dak Lak hiăng trâm mâ kuăn pơlê hdrối roh hôp má 4 Kuô̆k hô̆i hneăng 15 a mâu tơring Krông Ana, Cư Kuin, Ea Sup ƀă tơring Ƀuôn Đôn. Hên tơdroăng tung rêh ối châ kuăn pơlê pâ Kuô̆k hô̆i.  A rôh trâm mâ, khu kăn Kuô̆k hô̆i kong pơlê Dak Lak hiăng tơbleăng ăm kuăn pơlê tơdroăng vâ tối a roh hôp má 4 ƀă hlối tơmâng hnê tối, pâ thế dêi kuăn pơlê pơtroh ăm Kuô̆k hô̆i rôh kố.

Khu kăn Kuô̆k hô̆i kong pơlê Dak Lak trâm mâ kuăn pơlê hdrối roh hôp má 4, Kuô̆k hô̆i hneăng 15 

Tơmâng troh ‘mâi mơnhông cheăng kâ, kuăn pơlê dêi kong pơlê Dak Lak tối tiah kố, Chin phuh kal pơkâ mâu troăng rơhlâ tơdâng tơ’mô tâ nếo vâ rak  tơniăn yă, tơniăn tơdroăng tê mơdró tơmeăm ƀă kơdroh ki xơpá tơdroăng pêi cheăng, tê mơdró dêi khu mơdró ƀă kuăn pơlê. Tơmâng xo ƀă khĕn kơdeăn mâu tơdroăng kuăn pơlê tối, pâ thế mê, Khu kăn Kuô̆k hô̆i kong pơlê Dak Lak hiăng thế mâu kơ koan râ kơpêng ƀă kong pơlê tối nhên. ƀă mâu tơdroăng ki ê, khu kăn kô tơkŭm tâi tâng pâ thế Kuô̆k hô̆i, Chin phuh ƀă mâu khu xiâm kơvâ cheăng tung la ngiâ.

VOV Tây Nguyên/Tơplôu: Gương