VOV4.Xơ Đăng - Kơxê lơ 9/3, a Hngêi Kuô̆k hô̆i, Khu kăn séa ngăn dêi Kuô̆k hô̆i tơpui tơdroăng pêi tiô luât pơkâ tŏng kum, luât ‘na tơdroăng cheăng pơkâ hdró riân sap ing Luât pơkâ ai xêt khât chiâng pêi pro” hiăng pêi cheăng ƀă Pơlê kong kân Hồ Chí Minh, kong pơlê Đồng Nai ƀă Bình Dương tiô tơdroăng hôp mơ’no tiô troăng Internet.

Khu kăn Kuô̆k hô̆i pêi cheăng ƀă Pơlê kong kân Hồ Chí Minh, Bình Dương, Đồng Nai ‘na tơdroăng pơkâ hdró

Tiô khu kăn séa ngăn, klêi tơbleăng dêi 3 kong pơlê, ối hên tơdroăng thế mơnhên mê cho, tơdroăng chêh ƀă pơtroh ăm Ngế pro xiâm hnê ngăn Chin phuh kĭ pơkâ hdró pơlê kong kân, pơkâ hdró 2 kong pơlê  mơjiâng pro pơla hơnăm 2021-2030 nôkố mơjiâng pro hrá, Pơlê kong kân Hồ Chí Minh châ kĭ tơdroăng pêi pro  cho chêh hdró hdrối; kong pơlê Đồng Nai dế tơbleăng mchêh mơjiâng.

Tơbleăng mơgêi rôh pêi cheăng pôa Nguyễn Đức Hải, Ngế xiâm phŏ hnê ngăn Kuô̆k hô̆i ăm ‘nâi mâu kong pơlê, pơlê kong kân thế tơtrŏng mâu tơdroăng pâ thế vâ pêi pro tơdroăng tơtro ƀă pơkâ; mâu pơkâ ki tơdjâk troh rah xo hnê tối chêh pơkâ hdró; mâu pơkâ ‘na ‘mâi hơ’lêh tâi pơkâ mê ăm tơtro ƀă tơdroăng pêi pro; mâu pơkâ vâ tơniăn hnoăng cheăng rak ngăn dêi tơnêi têa drêng tah lôi mâu pơkâ mơjiâng tơmeăm khoăng.

Gương tơplôu ƀă tơbleăng