Pâ thế ƀă Khu râ kăn teăng mâ Kuô̆k hô̆i kong pơlê Kon Tum, kuăn pơlê kong kơdrâm Kon Tum pâ thế, pói vâ tơleăng mơnhên tơdroăng tơvâ tơvân tơdroăng ‘na tơnêi tơníu, ki má môi ƀă tơdroăng kơtăn kố 25 hơnăm kuăn pơlê mơ’no liăn rôe 46 ƀăng tơnêi a cheăm Vinh Quang xua Vi ƀan cheăm pro ăm.

Tiâ rơkong kuăn pơlê, pôa Dương Anh Hùng, Phŏ Kăn hnê ngăn Vi ƀan pơlê kong kơdrâm Kon Tum, tối ăm ‘nâi, roh tơdroăng Vi ƀan cheăm Vinh Quang xing xoăng 46 ƀăng tơnêi a km7 – Troăng kân 14 ăm mâu rơpŏng kuăn pơlê ƀă xo liăn, Khu séa ngăn kong pơlê Kon Tum hiăng mơgêi cho ôh tá tro hnoăng ki chiâng pêi pro.

Pôa Phạm Đình Thanh, Phŏ Kăn pơkuâ Khu kăn teăng mâ Kuô̆k hô̆i pơkuâ cheăng kong pơlê Kon Tum, tối ăm ‘nâi, khế 5/2024 Khu kăn teăng mâ Kuô̆k hô̆i kong pơlê Kon Tum hiăng mơnhên pâ thế kố ƀă ai mơ-éa pơtroh Vi ƀan kong pơlê Kon Tum pơkâ thế séa ngăn tơleăng.