Tiô pôa Jensen, ki xiâm dêi hneăng lăm pôu kố vâ tăng troăng tơpui trâu rơdâ ‘na luât tơpui kâ ƀă kring tơniăn xuân môi tiah mơnhông tơrŭm cheăng pơla Kuô̆k hô̆i péa tơnêi têa tung tơdroăng kal kí dế pơhlêh rĕng. Tung hneăng lăm pôu kố, Vi ƀan ngăn ‘na Luât pơkâ tơpui kâ dêi Kuô̆k hô̆i Đan Mạch trâm mâ hlối tơpui tơno ƀă mâu kăn xiâm Kuô̆k hô̆i ƀă Chin phuh Việt Nam ‘na mâu tơdroăng kal kí, luât pơkâ tơpui kâ ƀă ‘na kring tơniăn xuân môi tiah tơpui tơno drêng rôh tơrŭm cheăng krá tâ nếo pơla Kuô̆k hô̆i péa tơnêi têa tung mâu kơvâ cheăng ki péa pâ rơtế vâ ‘nâi plĕng. 

Hâi lơ 3/3, Khu kăn Vi ƀan ‘na luât tơpui kâ dêi Kuô̆k hô̆i Đan Mạch hiăng ai rôh hôp ƀă Vi ƀan Ngăn ‘na lêng, Kring vế ƀă Tơpui kâ dêi Kuô̆k hô̆i Việt Nam. A rôh hôp kố, péa pâ tơkŭm tơpui ‘na tơdroăng ki hlo tung lâp plâi tơnêi ƀă tung kơpong, ƀă hên mâu tơdroăng, ‘na luât lâp plâi tơnêi, tơdroăng tơrŭm cheăng pơla Việt Nam - Đan Mạch ƀă Việt Nam – Châu Âu.