A Gia Lai, pôa Hồ Quốc Dũng, Phŏ Ngế pro xiâm hnê ngăn tơnêi têa veăng leh mot hơnăm hriâm nếo a Hngêi trung phôh thong hnê ai tíu kâ koi ối pơtê râ má môi ƀă má péa Ia Púch. Hngêi trung châ mơjiâng pro a tơnêi rơdâ lối 5 hectar, kơxô̆ liăn ‘no pro vâ chê 178 rơtal liăn, ai 26 to lâm, ai tiô tơdroăng kal vâ hriâm, kâ koi ối pơtê ƀă kâ ối pơtê kơhâi dế ăm vâ chê 800 ngế hok tro, tung mê, ai hên hok tro mơngế Jarai.

Kố cho môi tung 7 to hngêi trung phôh thong hnê ai tíu kâ koi ối pơtê râ má môi ƀă má péa a mâu cheăm tơkăng kong dêi kong pơlê Gia Lai châ xúa tung hơnăm hriâm kố. A Khánh Hòa, pôa Nguyễn Khắc Định, Phŏ Kăn xiâm hnê ngăn Kuô̆k hô̆i veăng leh mot hơnăm hriâm nếo, hbru tơmeăm ăm thái cô Hngêi trung phôh thong hnê ai tíu kâ koi ối pơtê râ má péa ƀă râ má pái Pi Năng Tắc, ƀă vâ chê 480 ngế hok tro kuăn ngo.

Hngêi trung nếo dêi Hngêi trung mê châ ‘no liăn pro lối 83 rơtal liăn. Rôh kố, 4 to hngêi trung râ má môi a Kơpong Trường Sa, kong pơlê Khánh Hòa xuân hiăng tơkŭm po leh mot hơnăm hriâm nếo.