Tung chôu phut nhoăm pâ hmái hơtĭng, khu ki “Hnê mơhnhôk rơkê’’ dêi Lêng tơhrâ ƀă Pôa kô pơtối pêi tơƀrê tơdroăng cheăng hnê mơhnhôk dêi lêng a kơpong kuăn ngo ƀă kong ngo; vâ rế hên ngế “Hnê mơhnhôk rơkê”; pê klêi hnoăng cheăng pêi dêi Lêng tung rơxông ki nếo, rơxông mơnhông tơná dêi hdroâng kuăn ngo.

Mâu hơnăm hdrối mê hía nah, tơdroăng hnê mơhnhôk dêi Lêng a kơpong kuăn ngo ƀă kong ngo châ mâu đông lêng ƀă tâi tâng mâu lêng tơbleăng pêi tơdrêng, tŭm tơdroăng, tơbleăng troh lâp lu. Kăn ƀô̆, mâu Lêng ôh tá xâu pá puât, lăm troh a mâu pơlê cheăm “4 tơdroăng rơtế ƀă” (mê cho rơtế kâ, rơtế ối, rơtếa pêi, rơtế tơpui nâl kuăn ngo), tơrŭm krá ƀă râ ủi, mâu kăn a pơlê cheăm, hnê, mơhnhôk kuăn pơlê mơ-eăm mơnhông cheăng kâ- rêh ối, mơjiâng tơdroăng kal kí a pơlê cheăng krá rơdêi... Hên tơdroăng, Túa ki tro, túa pêi cheăng hriăn plĕng ki nếo, ai pơxúa kal kí- pơlê pơla ƀă rơkê plĕng khât... hiăng mơhno tơdroăng ki lĕm ‘na Mố đô̆i Pôa Hồ tung hiâm mơno kuăn pơlê.

A leh tơbleăng hnoăng, Đảng lêng xiâm tơnêi têa, Khu xiâm pơkuâ ngăn lêng hiăng khĕn kơdeăn 35 khu pú hên ƀă 80 ngế “Hnê mơhnhôk rơkê ‘’ dêi Lêng a kơpong kuăn ngo ƀă kong ngo pơla hơnăm 2019 - 2024.