Kơtăn kố châ 80 hơnăm, klêi ƀlêi trâng Kăch măng Khế tơheăm, hâi lơ 23/9/1945, Tĭnh bô̆ Việt Minh pơkâ mơjiâng Khu pơkuâ mô đô̆i kong pơlê Dak Lak, ki xiâm cho Tiêuh đoân tơleăng lĕm khu lêng N’Trang Lơng. Tơkâ hluâ mâu hneăng, khu mô đô̆i kong pơlê đi đo mơhno hiâm mơno kăch măng, ai hên tơdroăng veăng gum tung mâu roh tơplâ xâ ƀă tung tơdroăng mơjiâng, gâk kring Tơnêi têa.

Khu mô đô̆i kong pơlê hiăng châ Đảng, Tơnêi têa diâp hên kơxuô tơmeăm ki kơnía môi tiah Mê dái Hơlŏng trĭng, Mê dái Hồ Chí Minh, Mê dái Quân công, Inâi Kơ koan cheăng ‘’Khên tơnôu khu lêng kuăn pơlê’’. Roh kố, leh tơbâ 80 hơnăm hâi mơjiâng tơnêi têa, Kăn xiâm hnê ngăn tơnêi têa hiăng diâp Mê dái Gâk kring Tơnêi têa ối Má péa ăm Khu xiâm pơkuâ Mô đô̆i kong pơlê Dak Lak.