VOV4.Xơ Đăng - Kơxê lơ 12/1, Khu râ kăn pêi cheăng dêi Kơ koan xiâm xêo tơmeăm khoăng tơnêi têa xua pôa Trần Sỹ Thanh, Kăn cheăng tung Khu pơkuâ xiâm Đảng, Kăn xiâm pơkuâ xêo tơmeăm khoăng tơnêi têa pơkuâ xiâm hiăng ai roh pêi cheăng ƀă khu râ kăn pơkuâ kong pơlê Dak Lak ‘na tơdroăng pêi pro mâu tơdroăng tối mơgêi xêo tơmeăm khoăng dêi kong pơlê.

Tơbleăng ƀă khu râ kăn pêi cheăng, pôa Nguyễn Đình Trung, Kăn pơkuâ hnê ngăn cheăng Đảng kong pơlê Dak Lak hiăng tối mâu tơdroăng châ tơƀrê dêi kong pơlê tung pơla kố nah, tung mê, mâu khu râ, mâu kơvâ cheăng hiăng pêi pro kơtăng hnê mơhno dêi Khu xiâm Đảng, Chin phuh, Ngế pro xiâm hnê ngăn Chin phuh, pêi pro ‘’pơkâ péa xôh’’ rế tơkŭm thăm mơnhông pêt mơjiâng tơmeăm kâ, tê mơdró, tơniăn tơdroăng rêh ối pơlê pơla rế pêi pro kơtăng, châ tơƀrê tơdroăng hbrâ, mơdât pơreăng COVID-19.

Khu râ kăn pêi cheăng dêi Kơ koan xiâm xêo tơmeăm khoăng tơnêi têa pêi cheăng a kong pơlê Dak Lak

Xông tơpui a roh pêi cheăng, pôa Trần Sỹ Thanh mơnhên ƀă kheăn kơdeăn mâu tơdroăng châ tơƀrê ki kong pơlê Dak Lak hiăng châ tơƀrê tung hơnăm hiăng hluâ, ki má lối cho tung mâu kơvâ mơhnhôk mơ’no liăn cheăng ƀă tŏng kum khu tê mơdró. Ki rơhêng vâ tối, Dak Lak kal tơkŭm tơleăng rĕng, kêi tâi tâng mâu tơdroăng ki ối tơvâ tơvâ a Tơbleăng xêo tơmeăm khoăng kong pơlê sap hơnăm 2016 ngi hdrối ki Kơ koan xiâm xêo kế tơmeăm khoăng tơnêi têa hiăng tơpui tối mơgêi.

A Sa Ly tơplôu ƀă tơbleăng