VOV4.Xơ Đăng - Hâi lơ 4/3, Khu râ kăn pêi cheăng dêi Hô̆i đong hdroâng kuăn ngo dêi Kuô̆k hô̆i xua pôa Y Thanh Hà Niê Kdăm – Kăn cheăng tung Khu xiâm Đảng – Kăn cheăng tung Vi ƀan pơkuâ tơdroăng cheăng Kuô̆k hô̆i, Kăn hnê ngăn Hô̆i đong hdroâng kuăn ngo pơkuâ xiâm hiăng ai roh pêi cheăng ƀă Vi ƀan kong pơlê Sóc Trăng vâ séa ngăn, mơnhên tơdroăng ki tơdjâk drêng pêi pro Pơkâ dêi Ngế pro xiâm hnê ngăn Chin phuh ƀă pơkâ dêi Vi ƀan hdroâng kuăn ngo ‘na mâu troăng hơlâ ai tơdjâk troh kơpong hdroâng kuăn ngo a kong pơlê Sóc Trăng.

Tiô tơbleăng dêi Vi ƀan kong pơlê Sóc Trăng, tơdroăng pêi pro 02 pơkâ kố dế tung hneăng apoăng xua mê Vi ƀan kong pơlê hiăng pro tơ’lêi hlâu ăm mâu kong pơlê tung tơdroăng mơnhên tơdroăng pêi pro troăng hơlâ hdroâng mơngế hneăng nếo.

Xông tơpui a roh pêi cheăng, pôa Y Thanh Hà Niê Kdăm tối ăm ‘nâi ing rơkong pơkâ thế dêi kong pơlê Sóc Trăng, khu râ kăn kô tơmâng xo rơkong tơpui tối dêi mâu Khu xiâm, kơvâ cheăng ki tơdjâk ing mê ai mâu tơdroăng pâ thế troh Chin phuh vâ kum mâu kong pơlê pêi pro tơtro mâu troăng hơlâ tơ’lêi má môi ƀă châ tơƀrê má môi.

Katarina Nga tơplôu ƀă tơbleăng